آریان کو ضمانت ملنے کے بعد گوری خان جذبات پر قابو نہ رکھ سکیں اور روپڑیں

آریان خان کی ضمانت ہونے پر شاہ رخ خان بھی پرسکون نظر آئے فوٹوفائل

---

بالی ووڈ کنگ شاہ رخ خان کی اہلیہ گوری خان بیٹے آریان کو ضمانت ملنے کے بعد جذبات پر قابو نہ رکھ سکیں اور روپڑیں۔

منشیات کیس میں گرفتار کنگ خان کے بیٹے آریان خان کو گزشتہ روز بومبے ہائی کورٹ سے ضمانت مل گئی۔ بیٹے کو ضمانت ملنے کے بعد جہاں شاہ رخ خان کی آنکھیں نم ہوگئیں وہیں گوری خان بھی اپنے جذبات پر قابو نہ رکھ سکیں اور روپڑیں۔

بھارتی میڈیا کے مطابق جب سے آریان خان کی ضمانت ہونے کی خبر سامنے آئی ہے شاہ رخ خان کو بالی ووڈ انڈسٹری کے کئی اداکاروں سلمان خان، اکشے کمار اور سنیل شیٹھی سمیت متعدد اداکاروں کی جانب سے مبارکباد کے فون آرہے ہیں۔

یہ بھی پڑھیں: آریان کی ضمانت کے بعد شاہ رخ کی آنکھوں میں خوشی کے آنسو

گوری خان کو بھی مبارکباد دینے کے لیے ان کی دوستوں کی فون کالز موصول ہورہی ہیں۔ رپورٹس کے مطابق گوری اپنی قریبی دوست ماہیپ کپور اور سیما خان کے ساتھ فون پر آریان کی ضمانت کے بارے میں بات کرتے ہوئے جذبات پر قابو نہ رکھ سکیں اور روپڑیں۔

وہیں آریان کی بہن سہاناخان نے اپنے بھائی کے امریکا اور لندن میں موجود دوستوں کو انہیں سپورٹ کرنے کے لیے شکریہ ادا کیا۔ اپنے بھائی کی ضمانت کے بعد سہانا خان نے انسٹاگرام پر آریان اور والد شاہ رخ خان کے ساتھ بچپن کی چند یادگار تصاویر شیئر کرکے کہا کہ وہ ان سے بے حد محبت کرتی ہیں۔



واضح رہے کہ تین ہفتوں تک جیل میں رہنے کے بعد گزشتہ روز آریان خان کی ضمانت ہونے پر شاہ رخ خان بھی پرسکون نظر آئے اور اس عرصہ میں پہلی بار ان کے چہرے پر مسکراہٹ آئی ہے۔