آریان خان کا رہائی کے بعد قیدیوں کے خاندان کی مالی امداد کا وعدہ

ضمانت کی خبر سن کر آریان کے چہرے پر مسکراہٹ آگئی اور انہوں نے جیل حکام کا شکریہ ادا کیا

ویب ڈیسک October 29, 2021

آریان خان نے ضمانت کی خوشخبری دینے والے جیل حکام کا شکریہ ادا کیا فوٹوفائل

بالی ووڈ کے بادشاہ شاہ رخ خان کے بیٹے آریان خان نے جیل سے رہائی کے بعد چند قیدیوں کے خاندان کی مالی امداد کا وعدہ کیا ہے۔

منشیات کیس میں گرفتار آریان خان کو گزشتہ روز بومبے ہائی کورٹ سے بالآخر ضمانت مل ہی گئی۔ تاہم ابھی وہ جیل سے باہر نہیں آئے ہیں۔ آریان اور ان کے ساتھ ضمانت حاصل کرنے والے دیگر افراد کو عدالت کا تفصیلی فیصلہ آنے کے بعد آج یا پھر کل رہائی کا پروانہ ملے گا۔

یہ بھی پڑھیں: آریان کی جیل سے واپسی پر شاہ رخ اور گوری کا انتہائی قدم اٹھانے کا فیصلہ

آریان خان نے جیل میں کافی مشکل وقت گزارا تاہم گزشتہ روز تقریباً شام 6 بجے جب جیل حکام نے انہیں ضمانت کی خوشخبری سنائی تو وہ بہت زیادہ خوش ہوگئے اور ان کے چہرے پر مسکراہٹ آگئی۔ صرف یہی نہیں بلکہ آریان خان نے جیل حکام کا شکریہ بھی ادا کیا۔

رپورٹس میں یہ بھی بتایا گیا ہے کہ آریان کی آرتھر روڈ جیل میں قیام کے دوران کچھ قیدیوں سے واقفیت ہوگئی تھی اور انہوں نے رہائی کے بعد ان قیدیوں کے خاندانوں کی مالی مدد کرنے کا وعدہ کیا ہے۔

یہ بھی پڑھیں: آریان خان کا این سی بی آفیسر سے اچھا انسان بن کر دکھانے کا وعدہ

یاد رہے کہ اس سے قبل بھی جب آریان خان این سی بی کی کسٹڈی میں تھے تو کاؤنسلنگ سیشن کے دوران انہوں نے این سی بی کے زونل ڈائریکٹر سمیر وانکھیڑے سے وعدہ کیا تھا کہ وہ غریبوں اور پسماندہ لوگوں کی سماجی اور مالی بہتری کے لیے کام کریں گے اور ایک اچھا انسان بن کر دکھائیں گے۔