بھارت و کیویز پاکستانی شکست بھلانے کے خواہاں

ناک آؤٹ راؤنڈ میں پہنچنے کو بیتاب افغانستان کا مقابلہ بلند حوصلہ نمیبیا سے ہوگا۔ فوٹو: سوشل میڈیا

---

بھارت اور کیویز کوپاکستانی شکست بھلانے کا چیلنج درپیش ہے جب کہ دونوں ٹیمیں آج سیمی فائنل میں رسائی کی امیدوں کا دیا جلانے کی کوشش کریں گی۔

آئی سی سی ٹی 20 ورلڈ کپ میں اتوار کے روز گروپ 2 میں پاکستان سے شکست کھانے والی 3 ٹیمیں ایکشن میں ہوں گی اور تینوں کی نگاہیں میگا ایونٹ کے سیمی فائنل میں رسائی کی امیدوں کا دیا جلانے پر مرکوز ہوں گی۔

بڑا مقابلہ بھارت اور نیوزی لینڈ کے درمیان ہوگا، دونوں ہی اپنے ابتدائی میچز میں گرین شرٹس کے ہاتھوں شکست کا منہ دیکھ چکی ہیں، دونوں کو ہی اسی ناکامی کے اثرات سے باہر آنے کا سخت چیلنج درپیش ہوگا۔ ٹاس اور اوس دونوں ہی اس مقابلے میں بھی اہم کردار ادا کریں گے۔

کیویز اپنے فاسٹ بولنگ اٹیک سے بھارت کی مضبوط بیٹنگ لائن کو نشانہ بنانے کی حکمت عملی تیار کیے ہوئے ہے، فاسٹ بولر ٹم ساؤدی کہتے ہیں کہ بھارت ایک بہترین ٹیم اور وہ بھی ہماری طرح فتح کیلیے بے چین ہوں گے، اس لیے یہ ایک زبردست مقابلہ ثابت ہونے والا ہے، پہلا میچ ہمیشہ ہی کافی مشکل اور ہمیں پاکستان کی بہترین ٹیم کے ہاتھوں ناکامی ہوئی مگر اب ہم اس مختصر ٹورنامنٹ میں آگے کی جانب دیکھ رہے ہیں۔

دوسری جانب بھارت بھی اپنے تجربہ کار بیٹسمینوں کی مدد سے فتح حاصل کرنے کیلیے پراعتماد ہے، ٹیم میں فوری طور پر کسی ردوبدل کا امکان بظاہر کم ہے، جیت سے ویرات کوہلی بھی گرین شرٹس سے ملنے والی شکست کا غم کچھ کم کرنا چاہتی ہے۔

آج پہلے میچ میں پاکستان سے زیر ہونے والی افغان ٹیم کا سامنا نمیبیا سے ہوگا، افغانستان اور نمیبیا دونوں ہی اسکاٹ لینڈ کے خلاف سپر 12 راؤنڈ میں فتح کی بدولت 2، 2 پوائنٹس حاصل کرچکے ہیں، دونوں ہی ایک اور فتح سے اپنے سیمی فائنل میں رسائی کے امکانات کو تقویت پہنچانے کی کوشش کریں گے۔