پولیس اور رینجرز نے 155 ملزمان گرفتار کرکے اسلحہ برآمد کرلیا

رینجرز نے مختلف علاقوں میں کارروائیاں کرکے 28 ملزمان کو گرفتار کیا ۔فوٹو:راشد اجمیری/ایکسپریس،فائل

---

پولیس و رینجرز نے شہر کے مختلف علاقوں میں جرائم پیشہ افراد کے خلاف کارروائیاں کرتے ہوئے 155 ملزمان کو گرفتار کرکے ان کے قبضے سے بڑی تعداد میں اسلحہ ، منشیات ، نقدی اور مسروقہ سامان برآمد کرلیا ، ملزمان میں کالعدم تنظیموں اور لیاری گینگ وار کے کارکن شامل ہیں۔

تفصیلات کے مطابق سندھ پولیس نے 24 گھنٹے کے دوران 82 چھاپوں اور 6 مقابلوں کے بعد 127 ملزمان کو گرفتار کرلیا ، ملزمان میں 3 ٹارگٹ کلر ، 2 ڈکیت و رہزن جبکہ 26 اشتہاری و مفرور شامل ہیں ، 21 ملزمان کو اسلحہ ایکٹ جبکہ 13 کو منشیات ایکٹ کے تحت گرفتار کیا گیا ، ملزمان کے قبضے سے 26 ریوالور و پستول ، ایک کلاشنکوف جبکہ بڑی مقدار میں منشیات برآمد کی گئی ہے۔



رینجرز نے شہر کے مختلف مقامات پر چھاپہ مار کارروائیاں کیں جن میں سلطان آباد ، شاہ فیصل کالونی ، الیاس گوٹھ لیاقت آباد ، علی بستی ، سہراب گوٹھ ، لائنز ایریا ، پھول پتی لین ، گلشن بلاک اٹھارہ ، غازی ٹائون ، مجاہد کالونی ، اورنگی ٹائون دو نمبر ، ضیا کالونی ، فرنٹیئر کالونی ، بدر کمرشل ، شو مارکیٹ ، میکاسا اپارٹمنٹ ، عظیم پورہ ، گڈاپ سٹی ، سائٹ ایریا اور فرنٹیئر کالونی شامل ہیں ، ان علاقوں سے 28 ملزمان کو گرفتار کیا گیا جن کے قبضے سے مختلف اقسام کے 63 ہتھیار برآمد کیے گئے۔