سی ٹی ڈی نے پرانا گولیمار سے لیاری گینگ وار کے اہم دہشت گرد کو گرفتار کرلیا

ملزم نے چند روز قبل ساتھیوں کے ہمراہ پاک کالونی میں اپنے مخالف کے گھر پر فائرنگ کی اوراس کا گھر جلا دیا تھا، سی ٹی ڈی۔(فوٹو: فائل)

---

کاؤنٹر ٹیرر ازم ڈپارٹمنٹ ( سی ٹی ڈی ) نے پرانا گولیمار سے لیاری گینگ وار کے اہم دہشت گرد معراج عرف چھوٹو کو گرفتار کرلیاہے۔

سی ٹی ڈی ترجمان کی جانب سے جاری ہونے والے اعلامیے کے مطابق پرانا گولیمار سے گرفتار ہونے والا لیاری گینگ وار کااہم دہشت گرد معراج عرف چھوٹو رحمٰن ڈکیت کے قریبی رشتے اورگینگ وار کے دہشت گرد ساجد اور واجد کا بھانجہ ہے۔ ملزم نے دوران تفتیش سال 2019 میں پاک کالونی تھانے کے پولیس کانسٹیبل فاروق کو پاک کالونی اور عمران عرف گولہ والا کو ساتھیوں کے ہمراہ قتل کرنے کا دعوی کیا ہے۔

ملزم نے عابد عرف قبرستان اور سال 2012 میں گلو گھاس والے کو ساتھیوں کے ہمراہ فائرنگ کرکے قتل کرنے کا اعتراف بھی کیا۔

ترجمان سی ٹی ڈی کا دعوی ہے کہ دہشت گرد معراج عرف چھوٹو قتل کے متعدد مقدمات میں اشتہاری تھا، جب کہ گرفتار دہشت گرد نے چند روز قبل اپنے ساتھیوں کے ہمراہ مخالفین پر فائرنگ کر کے ان کا گھر جلا دیا تھا جس کا مقدمہ نمبر 330 سال 2021 پاک کالونی تھانے میں دو دن قبل ہی درج ہوا تھا۔

ترجمان کے مطابق ملزم پرانا گولیمار اور لیاری میں بھتہ وصول کرتا ہے جب کہ ملزم کا ریکارڈ دیگر تھانوں سے چیک کرایا گیا جو ملزم کے انکشافات سے مطابقت رکھتا ہے، سی ٹی ڈی پولیس نے ملزم معراج کو مزید کارروائی کے لیے پاک کالونی پولیس کے حوالے کر دیا ہے۔