نیوزی لینڈ نے افغانستان کو شکست دیدی بھارت سیمی فائنل کی دوڑ سے باہر

شاندار بولنگ کرنے پر ٹرینٹ بولٹ کو مین آف دی میچ دیا گیا - فوٹو: آئی سی سی

---

آئی سی سی ٹی ٹوئنٹی ورلڈکپ میں نیوزی لینڈ نے افغانستان کو شکست دے کر بھارت کو سیمی فائنل کی دوڑ سے باہر کردیا۔

متحدہ عرب امارات میں کھیلے گئے ٹی ٹوئنٹی ورلڈکپ کا انتہائی اہم میچ افغانستان نے نیوزی لینڈ کے خلاف ٹاس جیت کر پہلے بیٹنگ کی اور 125 رنز کا ہدف دیا جس کے جواب میں کیویز نے مطلوبہ ہدف 18.1 اوور میں پورا کرلیا۔

نیوزی لینڈ کی جیت کے ساتھ ہی ٹی ٹوئںٹی ورلڈکپ کے سیمی فائنل میں پہنچنے والی ٹیموں کی صورتحال بھی واضح ہوگئی اور نیوزی لینڈ کی رسائی کے بعد بھارت کی سیمی فائنل میں پہنچنے کی تمام امیدیں ختم ہوگئی اور وہ ایونٹ سے باہر ہوگیا ہے۔

دوسری جانب میگا ایونٹ کے سیمی فائنل میں پاکستان کا مقابلہ آسٹریلیا سے ہوگا جب کہ نیوزی لینڈ کی ٹیم انگلینڈ سے ٹکرائے گی۔

New Zealand are into the semis 👏#T20WorldCup | #NZvAFG | https://t.co/paShoZpj88 pic.twitter.com/PRo6Ulw4Dk

— T20 World Cup (@T20WorldCup) November 7, 2021

نیوزی لینڈ کے اوپنرز نے ہدف کے تعاقب میں پُراعتماد بیٹنگ کا آغاز کیا، مارٹن گپٹل 28 اور ڈیرل مچل نے 17 رنز کی اننگز کھیلی جب کہ کپتان کین ولیمسن 40 اور ڈیوڈ کونوے 36 رنز پر ناٹ آؤٹ رہے۔

قبل ازیں افغانستان کے ابتدائی بلے باز کوئی خاطر خواہ کارکردگی نہ دکھا سکے اور یکے بعد دیگرے وکٹیں گرتی رہیں تاہم نجیب اللہ نے گرتی ہو بیٹنگ لائن کو سنبھالا اور قیمتی 73 زنز کی اننگ کھیل کر ٹیم کا مجموعی اسکور 124 رنز تک پہنچانے میں کلیدی کردار ادا کیا۔

نجیب اللہ کے علاوہ کوئی بھی بلے باز بڑا اسکور نہیں کرسکا۔ صرف گلبدین نائب اور محمد نبی ہی ڈبل فیگر کراس کرسکے یوں افغانستان مقررہ 20 اوورز میں 8 وکٹوں کے نقصان پر 124 رنز ہی بناسکی۔

نیوزی لینڈ کی جانب سے ٹرینٹ بولٹ نے 3، ٹم ساوتھی نے 2 اور ایڈم ملنے، ایش سوڈھی، جیمز نشام نے ایک ایک وکٹ حاصل کی۔