جامعہ کراچی رئیس کلیہ فنون کی تقرری کا معاملہ نیا رخ اختیار کرگیا

جامعہ کراچی میں رئیس کلیہ فنون کی تقرری پرمعاملہ ایک نیارخ اختیارکرگیاہے جامعہ کراچی کی انتظامیہ نے رئیس کلیہ فنون کی تقرری کے لیے گورنر سیکریٹریٹ میں بھجوائے گئے ناموں میں شعبہ انگریزی کے پروفیسرکلیم رضاخان کانام شامل کردیاہے اور شعبہ ابلاغ عامہ کے پروفیسرمحمود غزنوی کانام بھجوائی گئی سینیارٹی لسٹ سے علیحدہ کردیاگیاہے۔

شعبہ عمرانیات کے پروفیسر فتح محمد برفت کانام گورنرسیکریٹریٹ کوبھجوائی گئی سینیارٹی لسٹ میں شامل نہیں، سینیارٹی لسٹ میں پروفیسر مونس احمر اور پروفیسر طاہر مسعود کے نام بھی شامل ہیں، واضح رہے کہ سینئرترین پروفیسر کی حیثیت سے پروفیسر ڈاکٹرمونس احمر رئیس کلیہ فنون کے عہدے کاچارج لے چکے ہیں تاہم اس عہدے پر مستقل تقرر ابھی باقی ہے۔




ادھریہ بھی معلوم ہواہے کہ سینیارٹی لسٹ میں پروفیسر طاہر مسعود سے سینئر ہونے کے دعویدارپروفیسرفتح محمد برفت نے سینیارٹی لسٹ میں اپنانام شامل نہ کیے جانے پر گورنر سیکریٹریٹ میں اعلیٰ حکام سے ملاقات بھی کی ہے، ان کا دعویٰ ہے کہ وہ سندھ حکومت کے قوانین کے تحت پروفیسرمونس احمر کے بعدسینئرترین پروفیسرہیں، دوسری جانب ذرائع کا کہنا ہے کہ چانسلرسیکریٹریٹ اس معاملے میں الجھنانہیں چاہتااس لیے عین ممکن ہے کہ اگرحکومت سندھ کی جانب سے کوئی سفارش نہ کی گئی تو چانسلر سیکریٹریٹ سے جلد رئیس کلیہ فنون کیلیے سینئرترین ڈاکٹرمونس احمرکانوٹیفکیشن جاری کردیا جائے۔