ورلڈکپ کے آخری گروپ میچ میں بھارت نے نمیبیا کو شکست دیدی

بھارت کی جانب سے روینڈرا جڈیجا اور روی چندر ایشون نے 3،3 وکٹیں حاصل کیں - فوٹو: آئی سی سی

---

آئی سی سی ٹی ٹوئنٹی ورلڈکپ میں گروپ مرحلے کے آخری میچ میں بھارت نے نمیبیا کو 9 وکٹ سے شکست دے دی۔

دبئی میں کھیلے گئے سپر12 مرحلے کے آخری میچ میں نمیبیا نے پہلے بیٹنگ کرتے ہوئے مقررہ 20 اوورز میں 8 وکٹ کے نقصان پر 132 رنز بنائے جس کے جواب میں بھات نے مطلوبہ ہدف 15.1 اوور میں ایک وکٹ کے نقصان پر پورا کیا۔

بھارت کی جانب سے کے ایل راہل اور روہت شرما نے نصف سنچریاں اسکور کیں، واحد آؤٹ ہونے والے کھلاڑی روہت تھے جنہوں نے 56 رنز کی اننگز کھیلی جب کہ کے ایل راہل 54 اور سوریا کمار یادو 25 رنز پر ناٹ آؤٹ رہے۔

India finish with a win.

Half-centuries from KL Rahul and Rohit Sharma get them comfortably home by 9 wickets against Namibia.

💻 https://t.co/L9Zw5TTmQs
📱 @BBCSounds#bbccricket #T20WorldCup pic.twitter.com/4sx38vgHHa

— Test Match Special (@bbctms) November 8, 2021

اس سے قبل بھارتی کپتان ویرات کوہلی نے ٹاس جیت کر پہلے نمیبیا کو بیٹنگ کی دعوت دی۔ نمیبیا کی جانب سے اسٹیفن بارڈ اور مائیکل وین لنگن نے ٹیم کو مستحکم آغاز فراہم کیا، اسٹیفن 21 اور مائیکل 14 رنز بناکر آؤٹ ہوئے۔ کریگ ولیمس کھاتہ کھولے بغیر پویلین واپس لوٹ گئے جب کہ کپتان گرہارڈ ایراسمس کی اننگز 12 رنز تک محدود رہی۔

نکول لفٹی ایٹن 5 اور جے جے اسمتھ 9 رنز بناکر آؤٹ ہوئے، وکٹ کیپر بلے باز زین گرین نے بھی کھاتہ کھولنے کی زحمت نہ کی۔ ڈیوڈ ویزے 26 رنز بناکر نمایاں رہے۔ بھارت کی جانب سے روینڈرا جڈیجا اور روی چندر ایشون نے 3،3 جب کہ جسپرٹ بمرا نے 2 وکٹیں حاصل کیں۔

واضح رہے ویرات کوہلی کا بطور کپتان یہ آخری ٹی ٹوئنٹی میچ ہے اور بھارتی ٹیم کے ہیڈ کوچ روی شاستری بھی آخری بار کوچنگ کے فرائض انجام دیں گے جس کے بعد راہول ڈریوڈ بھارتی ٹیم کی کوچنگ سنبھال لیں گے تاہم ٹی ٹوئنٹی میں بھارت کے نئے کپتان کون ہوں گے اس کا فیصلہ ابھی تک نہیں کیا گیا۔