وقار یونس نے قومی کرکٹ ٹیم کی کوچنگ کے لئے درخواست جمع کرادی

وقاریونس کو 2010 میں قومی ٹیم کا ہیڈ کوچ مقرر کیا گیا تھا فوٹو: فائل

---

قومی کرکٹ ٹیم کے سابق کپتان اور کوچ وقار یونس نے ایک مرتبہ پھر کوچنگ کے لئے درخواست جمع کرادی ہے۔

سابق ٹیسٹ کرکٹر وقاریونس نے نیشنل کرکٹ اکیڈمی لاہور میں کوچ کے عہدے کے لئے اپنی درخواست جمع کرائی۔ درخواست جمع کرانے کے بعد میڈیا سے بات کرتے ہوئے ان کا کہنا تھا کہ انہوں نے ماضی میں جن مسائل کے باعث کوچنگ چھوڑی تھی وہ اب حل ہوچکے ہیں اور اس لئے دوبارہ اس سلسلے میں درخواست جمع کرائی ہے انہیں امید ہے کہ پی سی بی کی جانب سے انہیں دوبارہ کوچنگ کا موقع دیا جائے گا۔بورے والا ایکسپریس کا کہنا تھا کہ انہیں اس بات کی خوشی ہے کہ 90 کی دہائی کے کرکٹر ایک مرتبہ پھر میدان میں آئے ہیں اور امید ہے کہ اس سے قومی کرکٹ کو فروغ ملے گا۔

وقاریونس کو 2010 میں قومی ٹیم کا ہیڈ کوچ مقرر کیا گیا تھا لیکن 2011 میں انہوں نے سینئیر کھلاڑیوں سے اختلافات کے بعد عہدے سے استعفی دے دیا تھا۔