عام صنعتوں سی این جی اسٹیشنز اور پاور پلانٹس کو 2 ماہ گیس کی فراہمی بند کرنے کا فیصلہ

گھریلو صارفین، برآمدی شعبے اور سیمنٹ سیکٹر کے لئے گیس کی فراہمی جاری رکھنے پر اتفاق

ویب ڈیسک November 18, 2021

گیس کی رسد سے متعلق تجاویز آئندہ اجلاس میں دوبارہ پیش کی جائیں گی۔ فوٹو: فائل

وفاقی کابینہ کی توانائی کمیٹی نے سردیوں کے لئے گیس لوڈ منیجمنٹ پلان کی تجاویز منظور کرلی ہیں۔

ایکسپریس نیوز کے مطابق وفاقی وزیر منصوبہ بندی اسد عمر کی زیر صدارت کابینہ کی توانائی کمیٹی کا اجلاس ہوا، جس میں رواں موسم سرما کے دوران گھریلو اور کمرشل صارفین کو گیس بحران سے بچانے کے لئے تجاویز پیش کی گئیں۔

ذرائع کا کہنا ہے کہ کابینہ کی کمیٹی نے کیپٹو پاور ، جنرل انڈسٹری اور سی این جی سیکٹر کو 2 ماہ کیلئے گیس کی فراہمی بند کرنے کی تجویز منظور کرلی ہے۔

کابینہ کمیٹی نے گھریلو صارفین کو گیس کی بلا تعطل فراہمی یقینی بنانے کی ہدایت کی ہے، اس کے علاوہ ایکسپورٹ اور سیمنٹ سیکٹر کے لئے گیس کی فراہمی جاری رکھنے پر اتفاق کیا گیا ہے ، گیس کی رسد سے متعلق تجاویز آئندہ اجلاس میں دوبارہ پیش کی جائیں گی۔