لاپتہ افراد کی بازیابی کیلیے لانگ مارچ کی ساہیوال آمد

وزیراعظم اور وزیراعلیٰ بلوچستان لاپتہ افراد کی بازیابی میں بے بس نظر آتے ہیں، ماماقدیر

Numainda Express February 07, 2014

وزیراعظم اور وزیراعلیٰ بلوچستان لاپتہ افراد کی بازیابی میں بے بس نظر آتے ہیں، ماماقدیر

بلوچستان سے لاپتہ افراد کی بازیابی کیلیے کوئٹہ سے اسلام آباد کیلیے لانگ مارچ کرتا خواتین، مردوں اور بچوں پر مشتمل پیدل قافلہ گزشتہ روز ساہیوال پریس کلب پہنچ گیا۔

قافلے کی قیادت وائس آف بلوچ مسنگ پرسنز کے وائس چیئرمین ماما قدیر خان بلوچ کر رہے ہیں۔ میڈیا سے بات کرتے ہوئے ماما قدیر بلوچ نے کہا کہ مشرف دور2005 میں جب وزیر داخلہ آفتاب شیر پائو تھے اس وقت4ہزار بلوچ ایجنسیوں کے پاس تھے، اس وقت لاپتہ افراد کی فہرست18ہزار500ہے جبکہ14ہزار کی لسٹ اقوام متحدہ کو 2009 میں دی گئی تھی۔ لاپتہ افراد کی بازیابی کے حوالے سے وزیراعظم نوازشریف اور وزیراعلیٰ بلوچستان بے بس نظر آتے ہیں ۔ سپریم کورٹ اس بارے میں متعدد بار احکامات جاری کرچکی ہے مگر کوئی عملدرآمد نہیں ہوسکا۔

photo 15_zps4430e6e8.jpg

انھوں نے دعویٰ کیا کہ13فروری2009کو ایجنسیوں نے میرے بیٹے جلیل ریگی کو اٹھایا جس کی 24نومبر2011کو مسخ شدہ لاش ملی۔ اب تک مسخ شدہ لاشوں کے ملنے کا سلسلہ سینکڑوں تک جا پہنچا ہے۔ جتنے بھی لوگ مارے جاچکے ہیں ان میں مبینہ طور پر ایجنسیاں ملوث ہیں۔ میرے بیٹے کا کسی دہشت گرد تنظیم سے نہیں بلکہ سیاسی جماعت سے تعلق تھا۔ بلوچستان میں پنجابیوں پر حملے کے حوالے سے بات کرتے ہوئے انھوں نے کہا کہ یہ تاثر غلط ہے کہ بلوچ پنجابیوں کے قتل عام میں ملوث ہیں، انھوں نے مطالبہ کیا کہ لاپتہ افراد کی بازیابی کیلیے حکومت ہنگامی بنیادوں پر اقدامات کرے تاکہ امن و امان قائم رہ سکے۔