نیہا شرما کی فلم ’’ینگستان‘‘ کا پہلا پوسٹر بھی جاری

کم عرصے میں مرکزی کرداروں میں کاسٹ ہونے پر خوش ہوں، بھارتی سیاست پر بنائی جانیوالی یہ فلم باکس آفس پر سپر ہٹ ثابت ہوگی،نیہا فوٹو : فائل

---

ISLAMABAD: بالی ووڈ اداکارہ نیہا شرما کی فلم ''ینگستان'' کے ٹریلر کے بعد فلم کا پہلا پوسٹر بھی جاری کردیا گیا ۔گزشتہ روز جاری ہونیوالے پوسٹر میں فلم کے ہیرو جیکی بھاگنانی اور ہیروئن نیہا شرما کو تاج محل کے سامنے ایک بنچ پر محبت بھرے انداز میں بیٹھے دکھایا گیاہے ۔

جیکی بھاگنانی نے سماجی رابطے کی ویب سائیٹ ٹویٹر پر فلم کا پوسٹر جاری کرتے ہوئے مداحوں کو اپنے پیغام میں کہا ہے کہ فلم کے ٹریلر کے بعد آج پہلا پوسٹر بھی جاری کررہا ہوں ا ور بھی یہ تو ابتدا ہے انھیں مزید بہت کچھ دیکھنے کو ملے گا۔ فلم کی ہدایات سید احمد افضال دے رہے ہیں فلم میں نیہا شرما اور جیکی بھاگنانی کے علاوہ بومن ایرانی بھی اہم کردار ادا کررہے ہیں جب کہ یہ فلم مرحوم اداکار فاروق شیخ کی آخری فلم ہے جس میں انھوں نے اداکاری کا مظاہرہ کیا ہے ۔ بھارت سیاست کے گرد گھومتی فلم کی کہانی ایک ایسے نوجوان کے متعلق ہے جو جاپان میں تعلیم حاصل کررہا ہوتا ہے اور اس کا والد بھارت کا وزیر اعظم ہوتاہے جو اچانک انتقال کرجاتا ہے جس پر اس 28سالہ نوجوان کو وزیراعظم بنادیاجاتاہے اوریہ کردار اداکارجیکی بھاگنانی ادا کررہے ہیں جب کہ نیہا شرما اس کی محبوبہ کے کردار میں ہیں ۔ دونوں باڈی گارڈز اور سیکرٹ سروسز کے افراد کے گھیرے میں ملاقاتیں کرتے ہیں اور ایک دوسرے کے ساتھ زندگی گزارنے کے وعدے کرتے ہیں ۔اطلاعات کے مطابق فلم کا پہلا شوٹنگ شیڈول اندور لکھنو اور بیرون ممالک میں مکمل کیا جاچکا ہے اور ان دنوں فلم کے دوسرے اسپیل کی شوٹنگ آگرہ میں کرنے کی تیاری کی جارہی ہے ۔

چار موسیقاروں جیت گنگولی، سنیہا خانوالکر ، شیراز اپل اور شیری عشق کی موسقی سے سجی یہ فلم 28 مارچ کو نمائش کے لیے پیش کی جائے گی ۔نیہا شرما کا اپنی اس فلم کے متعلق گفتگو کرتے ہوئے کہنا ہے کہ میں فلم میں مرکزی کردار نبھارہی ہوں اور یہ فلم میری پہلے سے ریلیز ہونے والی فلموں سے مختلف ہوگی بھارتی سیاست پر بنائی جانیوالی فلم میں رومانس کے ساتھ ساتھ تھرل بھی ہے ۔ موجودہ حالات میں یہ فلم باکس آفس پر سپر ہٹ ثابت ہوگی ایک سوال کے جواب میں اداکارہ کا کہنا تھا کہ کم عرصے میں مرکزی کرداروں میں کاسٹ کرنے پر خوش ہوں یہی میرے لیے اعزاز ہے ۔مرحوم اداکار فاروق شیخ کے متعلق گفتگو کرتے ہوئے نیہا شرما کا کہنا تھا کہ فاروق شیخ ایک بہترین اور منجھے ہوئے اداکارہ تھے اور فلم میں مرکزی کردار ادا کررہے تھے۔انھوںنے کئی موقعوں میں نہ صرف میری بلکہ بالی ووڈ کے متعدد فنکاروں کی رہنمائی کی ان کے دنیا سے جانے کا یقین نہیں آرہا ایسا محسوس ہوتا ہے کہ وہ اب بھی ہم میں موجود ہیں اور ہماری رہنمائی کررہے ہیں ۔



اداکارہ نے گزشتہ برس ریلیز ہونے والی فلم ''یملا پگلا دیوانہ 2 ''کے متعلق گفتگو کرتے ہوئے کہا کہ میرا خواب تھا کہ کبھی دھرمیندر جی کے ساتھ کام کروں جو گزشتہ برس اس اس فلم کے زریعہ پورا ہوگیا ۔ ان کے ساتھ کام کرنا میرے لیے بہت بڑا اعزاز اور ایوارڈ تھا اور میں خود کو بہت زیادہ خوش قسمت سمجھتی ہوں کہ انھوں نے مجھے اپنی پروڈکشن میں بنائی جانیوالی اس فلم میں مرکزی کردار دیا میں نے اس فلم میں کام کرنے کے دوران ان سے بہت کچھ سیکھا ہے اور اب بھی ان سے رابطے میں رہتی اور فلموں میں اپنے کردار کے متعلق رہنمائی لیتی رہتی ہوں ۔ ایک سوال کے جواب میں ا داکارہ نے کہا کہ بالی ووڈ کی تقریباً تمام اداکارائیں اشتہارات میں کام کررہی ہیں ۔ میں نے نیشنل فیشن انسٹیوٹ سے فیشن ڈیزاننگ کا کورس مکمل کرنے کے بعد شوبز کی دنیا میں بطور ماڈل قدم رکھا اس وقت بھی کئی اشتہاری فلموں میں کام کر رہی ہوں اور آئندہ بھی اداکاری کے ساتھ ماڈلنگ کو بھی جاری رکھوں گی ۔

اداکارہ کا کہنا تھا کہ میں نے رقص پر بھی خصوصی توجہ دی ہے امید ہے مییر آنیوالی فلموں میں شائقین مجھے میں ایک نئی اداکارہ کو دیکھیں گے ۔نیہا کا کہنا تھا اب تک ریلیز ہونے والی اپنی تمام فلموں میں بہترین ہدایکتاروں اور فلمسازوں کے ساتھ ساتھ اچھے فنکاروں کے ساتھ کام کیاہے جن سے بہت کچھ سیکھا ہے اور امید ہے کہ اپنی آنیوالی فلموں میں بھی ساتھ فنکاروں سے بہت کچھ سیکھوں گی ۔ واضح رہے کہ اداکارہ نے 2007میں تلگو فلم میں اداکاری کا آغاز کیا ۔تلگو فلم ''چیروتھا'' میں نیہا کی پرفارمنس کو سراہا گیا ۔پہلی ہندی فلم موہت سوری کی ''کروک ''تھی ،پھر کنال کوہلی کی فلم ''تیری میری کہانی ''میں مختصر کردار نبھایا ۔ نیہا شرما نے 2012میں ریلیز ہونے والی ایکتا کپور کی ہندی فلم ''کیا سپر کول ہیں ہم ''میں مکمل کردار نبھایا جسے شائقین نے پسند کیا ۔جب کہ اسی برس کے دوران دو اور فلموں ''جینتا بائی کی لواسٹوری' اور ''یملا پگلا دیوانہ2'' میں جلوہ گر ہوئیں ان دونوں فلموں میں نیہا کی پرفارمنس کو پسند کیا گیا ۔