چوری کے باعث عوام کو مہنگی بجلی خریدنے پر مجبور کیا جارہا ہے لاہور ہائیکورٹ

چوری کی روک تھام کےاقدامات سےآگاہ کیا جائے،چیف جسٹس عمر عطابندیال،پاور کمپنیوں کو 480ارب کی ادائیگی کی آڈٹ رپورٹ طلب

Numainda Express February 08, 2014

من پسند آئی پی پیز کو اربوں روپے کی ادائیگی کے باوجود سردیوں میں اتنی زیادہ لوڈشیڈنگ ہورہی ہے تو گرمیوں میں کیا حال ہوگا،درخواست گزار۔ فوٹو: فائل

چیف جسٹس لاہور ہائیکورٹ جسٹس عمر عطا بندیال نے قرار دیا ہے کہ بجلی چوری نہ روکنے کی وجہ سے عوام کو مہنگی بجلی خریدنے پر مجبور کیا جارہا ہے۔

فاضل جج نے بجلی چوری کی روک تھام کیلیے کیے گئے اقدامات سے عدالت کو آگاہ کرنے کی ہدایت کرتے ہوئے کیس کی سماعت 21فروری تک ملتوی کردی جبکہ نجی پاور کمپنیوں کو 480ارب روپے کی ادائیگی کے حوالے سے آڈٹ رپورٹ پیش کرنے کا حکم بھی جاری کردیا۔

photo 10_zps356b1d19.jpg

جمعے کو عدالت کے روبرو درخواست گزار نے بتایا کہ حکومت نے من پسند آئی پی پیز کو نوازنے کے لئے 480 ارب روپے ادا کیے جسکی وجہ سے لوڈ شیڈنگ پر قابو نہیں پایا جا سکا اور اب سردیوں میں بھی لوڈ شیڈنگ اتنی زیادہ ہورہی ہے تو گرمیوں میں کیا حال ہوگا؟۔ بجلی کی قیمتیں آئے روز بڑھائی جارہی ہیں جس سے ملکی معیشت اور عام آدمی کے لیے مشکلات پیدا ہورہی ہیں لہٰذا عدالت اس کا نوٹس لے اور بجلی کی غیر اعلانیہ لوڈ شیڈنگ ختم کرنے کے احکام جاری کیے جائیں۔ عدالت نے کے ای ایس سی کو 650 میگا واٹ زائد بجلی فراہم کرنے سے متعلق بھی تفصیلی ریکارڈ طلب میں پیش کرنے کی ہدایت کردی۔