سعودی ڈیولپمنٹ بینک اور اسٹیٹ بینک کے درمیان 3 ارب ڈالر ڈپازٹ کا معاہدہ

سعودی فنڈ، اسٹیٹ بینک کے پاس 3 ارب ڈالر رکھوائے گا، یہ رقم اسٹیٹ بینک کے زرمبادلہ ذخائر کا حصہ بن جائے گی (فوٹو : فائل)

---

LONDON: سعودی ڈیولپمنٹ بینک اور اسٹیٹ بینک آف پاکستان کے درمیان ڈپازٹ معاہدہ طے پاگیا۔

اسٹیٹ بینک آف پاکستان اور سعودی فنڈ فار ڈویلپمنٹ کے جاری کردہ مشترکہ اعلامیہ کے مطابق سعودی عرب اور حکومت پاکستان کے درمیان ایک ڈپازٹ معاہدے پر پیر کو دستخط کیے گئے جس میں سعودی عرب کی نمائندگی سعودی فنڈ برائے ترقی اور حکومتِ پاکستان کی نمائندگی اسٹیٹ بینک آف پاکستان نے کی۔

معاہدے پر سعودی فنڈ کے چیف ایگزیکٹو آفیسر سلطان بن عبدالرحمٰن المرشد اور گورنر اسٹیٹ بینک ڈاکٹر رضا باقر نے اسٹیٹ بینک کے ہیڈ آفس کراچی میں دستخط کیے۔ اس ڈپازٹ معاہدے کے تحت، سعودی فنڈ اسٹیٹ بینک کے پاس 3.0 ارب ڈالر رکھوائے گا۔ معاہدے کے تحت ڈپازٹ کی رقم اسٹیٹ بینک کے زرمبادلہ ذخائر کا حصہ بن جائے گی۔

یہ رقم پاکستان کے زرِ مبادلہ ذخائر میں معاونت کرے گی اور کووڈ 19 کی وبا کے منفی اثرات دور کرنے میں مددگار ثابت ہوگی۔ یہ ڈپازٹ معاہدہ مملکت سعودی عرب اور پاکستان کے درمیان مضبوط اور خصوصی تعلقات کی عکاسی کرتا ہے اور دونوں برادر ممالک کے درمیان اقتصادی تعلقات کو مزید فروغ دے گا۔