بارات سے اٹھائے گئے ایم کیوایم کے کارکن دولہے پر پولیس کا تشدد 4 اہلکار معطل

فہد عزیز کو پولیس نے اس وقت گرفتارکیا جب وہ اپنی بارات لے کر اورنگی ٹاؤن جارہا تھا۔ فوٹو: ایکسپریس

---

پولیس نے گزشتہ روز بارات سے حراست میں لئے گئے ایم کیو ایم کے کارکن دولہے فہد عزیز پر تشدد کے الزام میں 4 اہلکاروں کو معطل کردیا گیا ہے۔

ایکسپریس نیوز کے مطابق بارات سے حراست میں لئے گئے ایم کیو ایم کے کارکن دولہے فہد عزیز کی حالت گزشتہ رات پولیس تشدد کے باعث بگڑ گئی جس پر اسے گلستان جوہر کے ایک نجی اسپتال لایا گیا، معائنے کے دوران ڈاکٹروں نے فہد پر تشدد کی تصدیق کی ہے۔ واقعے کی خبر نشر ہونے پر پولیس کے اعلیٰ حکام نے تفتیشی افسر سمیت 4 پولیس اہلکاروں کو معطل کرکے ان کے خلاف محکمہ جاتی کارروائی شروع کردی ہے۔

واضح رہے کہ کورنگی سو کوارٹر کے رہائشی فہد عزیز کو گزشتہ رات شاہ فیصل کالونی سے پولیس نے اس وقت گرفتارکیا جب وہ اپنی بارات لے کر اورنگی ٹاؤن جارہا تھا۔