کراچی میں شوہر کے قتل کے الزام میں اہلیہ اور ساتھی گرفتار

انویسٹی گیشن پولیس نے اندھے قتل کا معمہ حل کرلیا

---

PESHAWAR: انویسٹی گیشن پولیس نے 6 ماہ قبل آئی ٹی کے کاروبار سے وابستہ شہباز نتھوانی کے قتل کا معمہ حل کرلیا ، پولیس نے مقتول کی اہلیہ اور اس کے ساتھی کو قتل کے الزام میں گرفتار کرلیا ۔

رواں سال 7 جون کو سچل کے علاقے اسکیم 33 مہران بنگلوز کے قریب صبح ساڑھے پانچ بجے نامعلوم ملزمان نے فائرنگ سے شہباز نتھوانی کو قتل کیا تھا اور جس وقت یہ واقعہ پیش آیا مقتول کی اہلیہ دانیہ اور 6 سالہ بیٹی بھی اس کے ہمراہ کار میں سوار تھی۔

سچل پولیس نے مذکورہ واقعے کا مقدمہ دفعہ 302/34 کے تحت مقتول کے والد شبیر نتھوانی کی مدعیت میں نامعلوم ملزمان کے خلاف درج کیا تھا۔

مدعی مقدمہ نے شک و شبہے کا اظہار کرتے ہوئے تحریر کرایا تھا کہ میرے بیٹے کو نامعلوم ملزم یا ملزمان نے ملی بھگت سے کسی دشمنی یا رنجش کی بنا پر قتل کرایا ہے اور اس واقعے کی اطلاع شہباز کے سالے شاہ رخ نے میرے بیٹے سیف کو موبائل فون پر صبح پونے چھ بجے کے قریب دی تھی ۔

شبیر نتھوانی کا کہنا تھا کہ میری بہو ایک ہفتے قبل میکے صفورہ گئی تھی جسے لینے کے لیے میرا بیٹا 6 جون کی شب تقریباً 10 بجے کے قریب گیا تھا اور 7 جون کی صبح واپسی پر اسے فائرنگ کر کے قتل کر دیا گیا تاہم انویسٹی گیشن پولیس نے 6 ماہ بعد قتل کا معمہ حل کرتے ہوئے واردات میں ملوث مقتول کی اہلیہ اور اس کے ساتھی جمشید کو گرفتار کرلیا ، مقتول شہباز نتھوانی کی ملزمہ سے 7 سال قبل شادی ہوئی تھی ۔