وکی کوشل نے کترینہ کیف کو شادی پر کیا تحفہ دیا

کترینہ کے شادی کے لباس کی قیمت 17 لاکھ روپے ہے، بھارتی میڈیا

ویب ڈیسک December 10, 2021

کترینہ نے شادی پر بھارت کے مشہور ڈیزائنر سبیا ساچی مکھرجی کا ڈیزائنر لہنگا زیب تن کیا تھا فوٹو سوشل میڈیا

لاہور: بالی ووڈ اداکار وکی کوشل اور کترینہ کیف شادی کے بندھن میں بندھ گئے شادی پر وکی نے اپنی دلہنیا کو انتہائی خوبصورت اور قیمتی تحفہ دیا ہے۔

بالی ووڈ کی باربی ڈول کترینہ کیف اور وکی کوشل کی شادی بھارتی ریاست راجستھان کے ضلع سوائی مادھوپور کے ایک نجی ہوٹل میں 9 دسمبر کو انجام پائی۔ وکی اور کترینہ دونوں نے اپنی شادی کی تصاویر سوشل میڈیا پر شیئر کرکے یہ خوشخبری پوری دنیا کو سنائی۔

یہ بھی پڑھیں: کترینہ کیف اور وکی کوشل شادی کے بندھن میں بندھ گئے

کترینہ کیف شادی پر سرخ لہنگے میں روایتی مشرقی دلہن کے روپ میں انتہائی خوبصورت نظر آئیں۔ کترینہ نے شادی پر بھارت کے مشہور ڈیزائنر سبیا ساچی مکھرجی کا ڈیزائنر لہنگا زیب تن کیا تھا، جس میں مٹکا ریشم پر باریک تلے کا کام کیا گیا تھا اس کے علاوہ لہنگے کے بارڈر پر زردوزی کا انتہائی خوبصورت کام بھی تھا۔ ایک بھارتی ویب سائٹ کے مطابق کترینہ کے شادی کے لباس کی قیمت 17 لاکھ روپے ہے۔

کترینہ کی شادی کے لباس کے ساتھ جیولری بھی سبیا ساچی مکھرجی کی ڈیزائن کردہ تھی۔ اداکارہ نے 22 قیراط سونے، ہیرے اور ہاتھ سے جڑے موتیوں کی انتہائی خوبصورت جیولری پہنی۔

کترینہ کے ساتھ ان کے دولہے وکی کوشل کا لباس بھی سبیا ساچی مکھرجی نے ہی تیار کیا تھا۔ وکی نے شادی پر انتہائی خوبصورت سلک شیروانی زیب تن کی تھی جس میں ہاتھ سے تیار کردہ سونے کی پرت چڑھے ہوئے بنگال ٹائیگر بٹن جڑے تھے۔

تاہم بھارتی میڈیا میں جس چیز کی سب سے زیادہ بات کی جارہی ہے وہ کترینہ کیف کی شادی کی انگوٹھی ہے۔ جسےکترینہ کے ہاتھ میں واضح طور پر دیکھا جاسکتا ہے۔ میڈیا رپورٹس کے مطابق یہ قیمتی انگوٹھی وکی کوشل نے کترینہ کو منگنی پر پہنائی تھی۔

یہ پلاٹینم کی انتہائی خوبصورت انگوٹھی ہے جس میں چھوٹے چھوٹے کئی ہیرے اور درمیان میں ایک نیلے رنگ کا انتہائی خوبصورت ہیرا جڑا ہے۔ اس قیمتی انگوٹھی کی قیمت 7 لاکھ 40 ہزار سے زائد ہے۔

اس کے علاوہ کترینہ کیف نے شادی پر تین ہیرے جڑا، سونے اور کالے موتیوں کی زنجیر والا جو منگل سوترا پہنا اس کی قیمت 5 لاکھ روپے ہے اور یہ بھی سبیا ساچی برانڈ کا ہی ہے۔ خیال رہے کہ منگل سوترا اس نیکلس کو کہتے ہیں جسے ہندو مذہب کی شادیوں میں دولہا دلہن کو پہناتا ہے۔