مودی کا ٹوئٹر اکاؤنٹ ہیک بٹ کوائن سے متعلق بڑا اعلان

بٹ کوائن کو سرکاری سطح پر تسلیم کرنے کا اعلان کیا گیا، فوٹو: فائل

---

LONDON: بھارتی وزیراعظم نریندر مودی کا ٹوئٹر اکاؤنٹ ہیک ہوگیا جس سے ڈیجیٹل کرنسی بٹ کوائن کو تسلیم کرنے کا اعلان کیا گیا ہے۔

عالمی خبر رساں ادارے کے مطابق بھارت کے وزیر اعظم نریندر مودی کے ٹوئٹر پر رات گئے اچانک اور غیر متوقع پر طور پر ملکی پالیسی سے متعلق اہم بیان نے نہ صرف صارفین کے ہوش اُڑا دیئے بلکہ کئی حکومتی اداروں کی بھی دوڑیں لگادیں۔

قصہ کچھ یوں ہے کہ رات دو بجے کے بعد وزیر اعظم مودی کی ٹوئٹ میں ڈیجیٹل کرنسی بٹ کوائن کو سرکاری طور پر تسلیم کرنے اور حکومت کی جانب سے 500 بٹ کوائن خریدکر عوام میں تقسیم کرنے کا اعلان کیا گیا۔



وزیراعظم نریندر مودی کی اس حیران کن ٹوئٹ میں ڈیجیٹل کرنسی کی خرید و فروخت پر عوام کی حوصلہ افزائی کرتے ہوئے کہا گیا کہ جلدی کیجیے، مستقبل کا آغاز آج سے ہو رہا ہے۔

خیال رہے کہ اس سے قبل بھارتی حکومت کی جانب سے بٹ کوائن یا کسی بھی قسم کی کرپٹو کرنسی کے استعمال سے متعلق کوئی سرکاری پالیسی وضع نہیں کی گئی تھی۔

The Twitter handle of PM @narendramodi was very briefly compromised. The matter was escalated to Twitter and the account has been immediately secured.

In the brief period that the account was compromised, any Tweet shared must be ignored.

— PMO India (@PMOIndia) December 11, 2021

وزیر اعظم کی اس ٹوئٹ سے ڈیجیٹل کرنسی میں کام کرنے والوں کی گویا چاندی ہوگئی تاہم یہ خوشی عارضی ثابت ہوئی کیونکہ ایک گھنٹے بعد ہی وزیر اعظم کے دفتر کے سرکاری ٹوئٹر اکاؤنٹ سے وزیر اعظم نریندر مودی کا ذاتی ٹوئٹر اکاؤنٹ ہیک ہونے کی تصدیق کی گئی۔

وزیر اعظم مودی کے دفتر کے سرکاری ٹوئٹر اکاؤنٹ کی ٹویٹ میں کہا گیا کہ ہیکر نے ڈیجیٹل کرنسی کے بارے میں گمراہ کن ٹوئٹ کی ہے جس کا سرکاری پالیسی سے کوئی لینا دینا نہیں ہے۔ اس لیے ان ٹوئٹس کو نظر انداز کیا جائے۔

2021 - At the strokes of midnight hour, when the world slep, Indian PM's account hacked and Bitcoin declared legal tender.

What prompts Narendra Modi to do everything at midnight ?

— Ravinder Kapur. (@RavinderKapur2) December 12, 2021

بعد ازاں نریندر مودی کا ذاتی ٹوئٹر اکاؤنٹ بحال کرکے بٹ کوائن سے متعلق ٹوئٹس کو فوری طور پر ہٹا دیا گیا تاہم صارفین نے بھارتی وزیراعظم پر مزیدار فقرے کسے اور مزاحیہ میمز بھی بنائیں۔