اسلام آباد ایئرپورٹ سے سعودی عرب منشیات اسمگل کرنے کی کوشش ناکام مسافر گرفتار

اے ایس ایف نے مسافر کو حراست میں لے کر اس سے تفتیش شروع کردی گئی ہے۔ فوٹو : فائل

---

ایئرپورٹ سیکیورٹی فورسز نے سعودی عرب منشیات اسمگل کرنے کی کوشش ناکام بناتے ہوئے ایک مسافر کو گرفتار کرلیا ہے۔

ایکسپریس نیوز کے مطابق سرگودھا سے تعلق رکھنے والا عبدالماجد نامی ایک مسافر بے نظیر انٹر نیشنل ایئر پورٹ سے غیر ملکی پرواز این ایل 719 کے ذریعے جدہ جارہا تھا۔ ایئر پورٹ حکام نے شک ہونے پر اس کے سامان کی تلاشی لی اور بیگ کے خفیہ خانوں سے ایک کلو گرام سے زائد ہیروئن برآمد کرلی۔

اے ایس ایف حکام کا کہنا ہے کہ مسافر کو حراست میں لے کر اس سے تفتیش شروع کردی گئی ہے تاکہ اس گھناؤنے کاروبار میں ملوث گروہ کو گرفتار کرکے اسے قانون کے مطابق سزا دی جاسکے۔