کراچی کے مختلف علاقوں میں فائرنگ اور دستی بم حملہ 7 افراد جاں بحق 2 زخمی

سائٹ ایریا میں غنی چورنگی کے قریب دستی بم حملے میں 2 افراد زخمی ہوگئے۔ فوٹو: فائل

---

کراچی کے مختلف علاقوں میں فائرنگ کے نتیجے میں 7 افراد جاں بحق جب کہ دستی بم حملے میں 2 زخمی ہوگئے۔

ایکسپریس نیوز کے مطابق کراچی کے علاقے ملیر سٹی کے تھانے سے چند قدم کے فاصلے پر گوشت گلی میں دوپہر ایک بجے نامعلوم افراد نے ایک دکان پر اندھا دھند فائرنگ کردی جس کے نتیجے میں 3 افراد شدید زخمی ہوگئے جنہیں جناح اسپتال منتقل کیا جارہا تھا کہ راستے میں 2 افراد زخموں کی تاب نہ لاتے ہوئے دم توڑ گئے جب ایک دوران علاج چل بسا۔ جاں بحق ہونے والے 2 افراد کی شناخت عبدالکریم گدھا گاڑی والا اور حاجی نور محمد کے نام سے ہوئی ہے۔

پولیس کا کہنا ہے کہ کہا جارہا ہے کچھ لوگ دکان داروں سے بھتہ لینے آئے تھے جس کے باعث فائرنگ کا واقعہ پیش آیا تاہم اس حوالے سےابھی وثوق سے کچھ کہنا قبل ازوقت ہوگا۔ پولیس کے مطابق جائے حادثہ سے کلاشنکوف اور نائن ایم ایم پستول کی گولیوں کے تقریبا 20 خول اور ایک مشتبہ موٹر سائیکل بھی ملی ہے جس کے ذریعے تحقیقات کا آغاز کردیا گیا ہے۔

دوسری جانب شاہ فیصل کالونی اور لیاری کی کھڈا مارکیٹ میں نامعلوم افراد کی فائرنگ سے 2 افراد اپنی جان سے ہاتھ دھو بیٹھے جب کہ قصبہ کالونی میں بھی 2 افراد دہشت گردوں کی اندھی گولیوں کا نشانہ بنے۔ ادھر سائٹ ایریا میں غنی چورنگی کے قریب دستی بم حملے میں 2 افراد زخمی ہوئے جنہیں طبی امداد کےلئے اسپتال منتقل کردیا گیا ہے۔