امریکی طوفانی بگولوں نے شکستہ گھر سے تصویر اٹھا کر 200 کلومیٹر دور پہنچادی

کینٹکی کے ہوائی بگولے نے ایک شکستہ گھر سے تصویر اٹھا کر اسے 200 کلومیٹر دور پہنچادیا۔ فوٹو: بشکریہ یوپی آئی

---

چند روز قبل امریکی ریاست کینٹکی میں ایک سے زائد خوفناک طوفانی بگولوں ٹورنیڈو نے جہاں کاروں اور گھروں کو کھلونوں کی طرح اٹھا کر پٹخا وہیں ایک دلچسپ واقعہ یہ بھی پیش آیا ہے کہ ایک یادگار خاندانی تصویر اصل مقام سے 206 کلومیٹر دورملی۔

یہ تصویر کینٹکی کے شہر لوئی ویلی کے ایک شکستہ مکان سے اڑی اور اسے تیزا ہوا کا بگولہ اوہایو دریا کے پار لے گیا جہاں ہفتے کی صبح نیو البانی انڈیانا کی خاتون کیٹی پوسٹن کی کار کے شیشے پر چپک گئی۔ یہ تصویر بتارہی تھی کہ شہر کا کیا حال ہوا ہوگا۔

کیٹی نے اس تصویر کو دیکھا تو وہ بلیک اینڈ وائٹ تھی جس کی پشت پر دونام لکھے تھے اور 1942ء کی تاریخ تحریرتھی۔ تصویر میں خاتون کی گود میں ایک بچہ بیٹھا دکھائی دے رہا ہے۔ کیٹی کئی روز سے موسم پر نظر رکھے ہوئی تھیں اور وہ جان گئیں کہ شاید یہ تصویر ہوا کے دوش پر اڑ کر کہیں سے پہنچی ہے۔

انہوں نے فوری طور پر تصویر تمام سوشل میڈیا پلیٹ فارم پرپوسٹ کردیا۔ اگلے تین گھنٹوں میں تصویر کے مالک اصلی خاندان کا پتا لگالیا گیا۔

کو سوازیل نامی ایک صارف نے کیٹی کی پوسٹ کے نیچے ان کا شکریہ ادا کرتے ہوئے کہا کہ یہ ان کے اہلِ خانہ کی ایک تصویر ہے جو ڈاسن اسپرنگز میں رہائش پذیر تھا۔ اب کیٹی خود اس تصویر کو واپس کرنے کے لیے اس گھر تک جائیں گی۔