نشتر اسپتال کے ایمرجنسی وارڈ میں آگ لگنے سے بھگدڑ مچ گئی تاہم مریض اور اسپتال کا عملہ محفوظ رہا۔
ایکسپریس نیوز کے مطابق اسپتال کے ایمرجنسی وارڈ کے گراؤنڈ فلور میں اچانک آگ بھڑک اٹھی جس سے پورے اسپتال میں دھواں چھاگیا اور ایمرجنسی وارڈ میں بھگدڑ مچ گئی، آگ کے باعث سیکڑوں مریض، ڈاکٹرز اور نرسیں اپنی جان بچانے کی کوشش میں اسپتال سے باہر نکل آئے جبکہ تشویشناک حالت میں ایمرجنسی وارڈ کے مریضوں کو بھی باہر نکال کر محفوظ مقام پر منتقل کیا گیا۔
آگ کی اطلاع ملنے پر ریسکیو 1122 اور فائر فائٹرز کا عملہ موقع پر پہنچ گیا اور فوری طور پر آگ پر قابو پالیا تاہم دھویں کے باعث امدادی کارروائیوں میں مشکلات کا سامنا رہا جبکہ آگ لگنے سے اسپتال کے میڈیکل اسٹور میں موجود ادویات اور اسپتال کا دیگر سامان جل کر خاکستر ہوگیا۔
اسپتال کے ایمرجنسی وارڈ میں لگنے والی آگ پر قابو پانے کے بعد مریضوں کو واپس وارڈ میں منتقل کردیا گیا جبکہ واقعے کی تحقیقات کا بھی آغاز کردیا گیا ہے۔