ویمنز ورلڈ کپ میں بھی پاک بھارت معرکہ ہوگا

نیوزی لینڈ میں شیڈول ون ڈے میگا ایونٹ میں دونوں ٹیمیں 6مارچ کومقابل ہونگی۔

Sports Desk December 16, 2021

نیوزی لینڈ میں شیڈول ون ڈے میگا ایونٹ میں دونوں ٹیمیں 6مارچ کومقابل ہونگی۔ فوٹو : فائل

MULTAN: ویمنز ورلڈ کپ میں بھی پاک بھارت معرکہ ہوگا جب کہ نیوزی لینڈ میں شیڈول ون ڈے میگا ایونٹ میں دونوں ٹیمیں 6 مارچ کو مدمقابل ہوں گی۔

انٹرنیشنل کرکٹ کونسل نے 4 مارچ 2022 سے نیوزی لینڈ میں شیڈول ویمنز ون ڈے ورلڈ کپ کا مکمل شیڈول جاری کردیا، افتتاحی میچ میزبان اور ویسٹ انڈیز کے درمیان کھیلا جائے گا، ابتدائی مقابلوں میں 2 بڑی مسابقتیں مرکز نگاہ ہوں گی۔

5 مارچ کو پہلے آسٹریلیا اور انگلینڈ کا ہیملٹن کے سیڈون پارک میں ٹکراؤ ہوگا،6 تاریخ کو پاکستان اور بھارت کی ٹیمیں تورنگا میں مدمقابل آئیں گی۔ گرین شرٹس اپنا دوسرا میچ 8 مارچ کو آسٹریلیا کے خلاف کھیلیں گی، 11 مارچ کو جنوبی افریقہ سے سامنا ہوگا، بنگلہ دیش سے 14 مارچ کو مقابلہ ہونا ہے۔

21 مارچ کو پاکستان اور ویسٹ انڈیز کے درمیان میچ کھیلا جائے گا، انگلینڈ سے سامنا 24 مارچ کو ہونا ہے، لیگ راؤنڈ میں پاکستان ٹیم اپنا آخری میچ میزبان نیوزی لینڈ سے 26 مارچ کو کھیلے گا۔ مجموعی طور پر 31 دنوں میں اتنے ہی میچز ہوں گے۔ آکلینڈ، کرائسٹ چرچ، ڈونیڈن، ہیملٹن، تورنگا اور ویلنگٹن میزبان شہر ہیں۔

آسٹریلیا، انگلینڈ، جنوبی افریقہ اور بھارت نیٹورنامنٹ کیلیے چیمپئن شپ میں پوزیشن کی بنیاد پر براہ راست کوالیفائی کیا، نیوزی لینڈ کو میزبان ہونے کے ناطے جگہ ملی، باقی 3 پوزیشنز کیلیے زمبابوے میں کوالیفائنگ ایونٹ کورونا وائرس کے باعث منسوخ ہونے کے باعث پاکستان، بنگلہ دیش اور ویسٹ انڈیز کو رینکنگ کی بنیاد پر میگاٹورنامنٹ کھیلنے کا حقدار قرار دیا گیا۔ ٹورنامنٹ لیگ فارمیٹ میں ہوگا۔

تمام ٹیمیں ایک دوسرے کا سامنا کریں گی،ٹاپ 4 ٹیموں میں سیمی فائنلز30 اور 31 مارچ کو کھیلے جائیں گے، فائنل 3 اپریل کو ہوگا، دونوں سیمی فائنلز اور فائنل کیلیے ریزرو ڈے مختص کیا گیا ہے۔