17 حسیناؤں کے کووڈ ٹیسٹ مثبت آنے کے بعد مس ورلڈ 2021 مقابلہ ملتوی

مقابلہ حسن کے فائنل کی نشریات کو اگلے 90 دنوں میں دوبارہ شیڈول کیا جائے گا فوٹوفائل

---

لاہور: مس ورلڈ مقابلے میں حصہ لینے والی 17 حسیناؤں کے کورونا ٹیسٹ مثبت آنے کے بعد مس ورلڈ 2021 مقابلے کا پروگرام عارضی طور پر ملتوی کردیا گیا۔

بھارتی میڈیا کی رپورٹس کے مطابق مس ورلڈ 2021 کی انتظامیہ نے حال ہی میں ایک بیان دیتے ہوئے کہا ہے کہ مقابلہ حسن میں حصہ لینے والوں میں بڑھتے ہوئے کووڈ کیسز کو مد نظر رکھتے ہوئے مس ورلڈ آرگنائزیشن نے مقابلہ حسن کے فائنل کو ملتوی کرنے کا فیصلہ کیا ہے۔

یہ فیصلہ اس وقت لیا گیا جب مقابلہ حسن میں حصہ لینے والی 17 مدمقابل خواتین اور عملے کے ممبران کے کورونا ٹیسٹ کا رزلٹ مثبت آیا ہے۔

کووڈ سے متاثر ہونے والوں میں بھارت کی منسا وارانسی بھی شامل ہیں جو مس انڈیا 2020 کا تاج سر پر سجانے کے بعد بین الاقوامی مقابلہ حسن میں بھارت کی نمائندگی کررہی تھیں۔

انتظامیہ کا کہنا ہے کہ مقابلہ حسن کے فائنل کی نشریات کو اگلے 90 دنوں میں پورٹوریکو میں دوبارہ شیڈول کیا جائے گا۔