ون ڈے سیریز ملتوی ہونے کے بعد ویسٹ انڈیز کرکٹ ٹیم واپس وطن روانہ

جن کھلاڑیوں اور اسٹاف ارکان کا کوویڈ ٹیسٹ مثبت آیا ہے وہ قرنطینہ مکمل کرکے روانہ ہوں گے، ترجمان پی سی بی

---

ISLAMABAD: پاکستان کے دورے پر آئی ویسٹ انڈیز کی کرکٹ ٹیم واپس اپنے گھر روانہ ہوگئی ہے۔

ٹی ٹوئنٹی سیریر مکمل اور ون ڈے سیریز ملتوی ہونے کے بعد پہلے مرحلے میں 20 رکنی دستہ وطن واپس روانہ ہوگیا ہے، گھر کی راہ لینے والوں میں کھلاڑی اور ٹیم مینجمنٹ کے ارکان شامل ہیں۔

پی سی بی ترجمان کے مطابق جمعہ کی صبح کراچی سے ویسٹ انڈیز اسکواڈ کے 20 ارکان کی روانگی ہوئی جن میں کھلاڑی اور اسپورٹ اسٹاف کا عملہ بھی شامل ہے جب کہ کوچ فل سمنز کی واپسی کے لیے آج شام کی فلائٹ طے ہے، باقی 6 کھلاڑی اور 3 سپورٹ اسٹاف کے ارکان جن کا کوویڈ ٹیسٹ مثبت آیا تھا وہ ہوٹل میں ہی قرنطینہ مکمل کریں گے، ان کی وطن روانگی کا بندوبست کوویڈ ٹیسٹ منفی آنے پر ہوسکے گا۔

واضح رہے کہ ٹی ٹوئنٹی سیریز میں پاکستانی ٹیم نے شاندار پرفارمنس کا مظاہرہ کرکے کلین سوئپ کیا، مہمان ٹیم کے کیمپ میں کوویڈ کیسز کی موجودگی پر پاکستان کرکٹ بورڈ اور ویسٹ انڈیز کرکٹ بورڈ نے مشترکہ طورپر ون ڈے سیریز کو اگلے سال جون تک ملتوی کرنے کا اعلان کیا ہے۔