متحدہ عرب امارات نے سینما سنسرشپ ختم کردی

متحدہ عرب امارات نے فلم بینوں کی درجہ بندی +21 کردی، فوٹو: فائل

---

کراچی: متحدہ عرب امارات نے فلموں کی سنیما میں نمائش سے متعلق قوانین کو نرم کرتے ہوئے سنسر شپ ختم کرنے کا فیصلہ کیا ہے جس کے لیے 21+ ریٹنگ متعارف کرائی گئی ہے۔

متحدہ عرب امارات کے میڈیا ریگولیٹری اتھارٹی نے ٹوئٹر پر اعلان کیا ہے کہ سینما میں فلموں کی نمائش کے لیے عمر کے حساب سے درجہ بندی 21+ مقرر کردی گئی ہے جس کے بعد سینما گھروں میں 21 سال سے زائد عمر کے فلم بین عالمی ورژن کے مطابق فلمیں دیکھ سکیں گے۔

The Media Regulatory Office announced the inscribed of the 21+ for the age classification categories for cinema films.#UAE_BARQ_EN pic.twitter.com/5PxkDHCsDl

— UAE BARQ (@UAE_BARQ_EN) December 19, 2021

قبل ازیں متحدہ عرب امارات میں سینما گھروں میں فلموں کو نمائش کے لیے سخت سنسر شپ سے گزرنا پڑتا تھا اور عالمی ورژن کے تحت فلموں کو دکھانے کی ممانعت کے باعث بالغوں کے مواد والی فلموں کی کانٹ چھانٹ یا ایڈٹ کی جاتی تھی۔

خیال رہے کہ متحدہ عرب امارات خلیجی ممالک میں سب سے زیادہ آزاد خیال ملک تصور کیا جاتا ہے اور حالیہ برسوں میں مزید جدت لانے کے لیے ریاست اپنے قوانین میں مسلسل ترمیمات کر رہی ہے۔

یہ خبر پڑھیں : یو اے ای نے شادی سے قبل جنسی تعلق کو جرائم کی فہرست سے نکال دیا

گزشتہ برس متحدہ عرب امارات نے 'سوشل لبرلائزیشن 'مہم کے تحت غیر شادی شدہ جوڑوں کے ایک ساتھ رہنے پر پابندی اور بغیر شادی کے بچوں کی پیدائش پر سزا ختم کرنے سمیت شراب نوشی سے متعلق پابندیوں میں نرمی کی تھی۔

یہ خبر بھی پڑھیں : متحدہ عرب امارات کے صدارتی محل میں پہلی بار اسرائیل کا جھنڈا لہرا دیا گیا

علاوہ ازیں رواں ماہ کے آغاز میں مغربی طرز پر جمعے کے بجائے ہفتہ اور اتوار کی ہفتہ وار تعطیلات کا اعلان کیا ہے اور جمعے کو یوم مسلمہ ختم کردیا گیا ہے۔

یہ بھی پڑھیں : متحدہ عرب امارات کا دفاتر میں ہفتے میں ڈھائی دن چھٹی کا اعلان

واضح رہے کہ متحدہ عرب امارات میں 10 ملین کی آبادی کا 90 فیصد غیر ملکی شہری ہیں جو زیادہ تر ملازمتوں اور کاروبار کے لیے مقیم ہیں۔