کوئٹہ گلیڈی ایٹرز میں شامل شاہد آفریدی اپنی ہی ٹیم سے ٹکرائیں گے

پی ایس ایل سے قبل ہونے والے میچ میں آفریدی گلیڈی ایٹرز کے خلاف ایکشن میں نظر آئیں گے (فائل فوٹو)

---

پاکستان سپر لیگ 7 (پی ایس ایل) میں کوئٹہ گلیڈی ایٹرز کا حصہ بننے والے شاہد خان آفریدی اپنی ہی ٹیم کے خلاف ایکشن میں نظر آئیں گے۔

ایکسپریس نیوز کے مطابق کراچی کے نیشنل اسٹیڈیم میں 15 جنوری کو عطیات جمع کرنے کے حوالے سے کرکٹرز اور شوبز اسٹارز کی ٹیموں کے درمیان فلڈ لائٹ میچ کھیلا جائے گا۔

شاہد آفریدی فاؤنڈیشن اور کوئٹہ گلیڈی ایٹرز کے اشتراک سے کھیلے جانے والے میچ میں قومی ٹیم کے سابق کپتان سرفراز احمد کوئٹہ گلیڈی ایٹرز جبکہ شاہد آفریدی اپنی فاؤنڈیشن کی ٹیم کی قیادت کریں گے۔

مزید پڑھیں: شاہد آفریدی اورجیمزونس کوئٹہ گلیڈی ایٹرزمیں شامل

دوستانہ میچ میں عمر اکمل، سہیل تنویر اور سابق عالمی اسکواش چیمپئن جہانگیر خان جبکہ معرف شوبز اسٹارز سمیت دیگر شخصیات بھی حصہ لیں گی۔

واضح رہے کہ پاکستان سپرلیگ کے ساتویں ایڈیشن میں شاہد خان آفریدی کوئٹہ گلیڈی ایٹرز کی نمائندگی کرتے نظر آئیں گے۔

یہ بھی پڑھیں: میری ریٹائرمنٹ تب ہوگی جب اللہ مجھے بلائے گا، شاہد آفریدی

یہ بھی یاد رہے کہ 41 سالہ شاہد آفریدی نے پی ایس ایل 7 کے بعد ہر طرز کی کرکٹ سے ریٹائرمنٹ لینے کا اعلان کیا ہے۔ انھوں نے گذشتہ سیزن میں ملتان سلطانز کی نمائندگی کرتے ہوئے 4 میچز میں صرف 3 رنز بنائے اور 2 وکٹیں حاصل کیں تھیں۔