کراچی بارش کے بعد فلائٹ آپریشن شدید متاثر کئی علاقوں میں بجلی غائب

بارش کا سلسلہ 7 جنوری تک جاری رہے گا۔ (فائل فوٹو)

---

ISLAMABAD: شہر قائد میں ہونے والی بارش کے بعد 10 عالمی اور مقامی پروازیں منسوخ ہوگئیں جبکہ مختلف علاقوں میں بجلی کی فراہمی معطل ہوگئی ہے۔

ایکسپریس نیوز کے مطابق کراچی میں آج شام سے وقفے وقفے سے ہونے والی بارش کے بعد جہاں سردی کی شدت میں اضافہ ہوا وہیں مختلف علاقوں میں بجلی کی فراہمی بھی معطل ہوگئی ہے۔

گلشن حدید، گلشن معمار، لانڈھی، بلدیہ ٹاؤن، لیاقت آباد، کیماڑی، اولڈ سٹی ایریا، بفرزون، سرجانی ٹاؤن، اورنگی ٹاؤن سمیت کئی علاقے گزشتہ گھنٹے سے تاریکی میں ڈوبے ہوئے ہیں۔

ذرائع کے مطابق بارش سے کےالیکٹرک کے 200 سے زائد فیڈرز متاثر ہوئے جبکہ کچھ علاقوں میں تاریں ٹوٹنے کی شکایات بھی سامنے آئیں ہیں۔

مزید پڑھیں: کراچی میں 8 جنوری سے سردی بڑھے گی،محکمہ موسمیات

محکمہ موسمیات کے مطابق شہر کراچی کے مختلف علاقوں میں آج شام سے شروع ہونے والی ہلکی اور تیز بارش کا ‏سلسلہ 7 جنوری تک جاری رہے گا۔

دوسری جانب کے الیکٹرک نے برسات کے بعد ایک بار پھر شہریوں کو خبردار کیا ہے کہ وہ بارش کے وقت الیکٹرک سوئج، بجلی کے کھمبوں کے قریب جانے سے گریز کریں اور گیلے ہاتھوں یا چپلوں کے بغیر برقی آلات کو ہاتھ نہ لگائیں۔

برسات کے وقت سوئچز جیسے کہ اسٹریٹ لائٹ سوئچ یا گھر کی گھنٹی میں پانی جانے کی وجہ سے کرنٹ لگنے کا خدشہ ہوتا ہے. صارفین بارش کے موسم میں گیلے ہاتھوں سے یا ننگے پاؤں کے ساتھ کسی بھی قسم کے سوئچ یا برقی آلات کا استعمال نہ کریں.
بارش کے موسم میں اپنا اور اپنے پیاروں کا خیال رکھیں۔ pic.twitter.com/wWJq3mZd4M

- KE (@KElectricPk) January 4, 2022

 

دوسری جانب کراچی میں ہونے والی بارش اور دھند کے باعث فضائی آپریشن بھی شدید متاثر ہوا ہے، کراچی سے جانے والی دو انٹرنیشنل پروازوں گلف ایئر، اومان ایئر کو معطل کردیا گیا ہے، اسی طرح پی آئی اے کی کراچی سے تربت، سکھر، ملتان جانے والی پرواز بھی منسوخ کردی گئی۔

سول ایوی ایشن کے ترجمان کے مطابق کراچی ایئرپورٹ سے مختلف شہروں کو جانے والی ملکی اور غیر ملکی ایئرلائنز کی 10 پروازیں منسوخ کردی گئیں ہیں۔

علاوہ ازیں ایڈمنسٹریٹر کراچی بیرسٹرمرتضیٰ وہاب نے اب سے کچھ دیر قبل شہر کے مختلف علاقوں کا دورہ کیا۔ انہوں نے بتایا کہ شاہراہ فیصل، پی ای سی ایچ ایس اور بہادر آباد کی صورت حال معمول کے مطابق ہے۔