لاہور میں ایک ساتھ لاپتہ ہونے والی 4 سگی بہنیں بازیاب

لوگوں کے گھروں میں کام کرکے واپس پہنچی تو بچیاں گھر میں نہیں تھیں، ماں کا بیان۔ فوٹو:فائل

---

CHICAGO: فیکٹری ایریا کے علاقے سے 4 معصوم بہنیں اچانک غائب ہوگئیں، تاہم پولیس نے کارروائی کرکے چاروں کو بازیاب کرلیا۔

ایکسپریس نیوز کے مطابق لاہور کے علاقے فیکٹری ایریا میں 4 سگی بہنیں ایک ساتھ لاپتہ ہوگئیں، لاپتہ ہونے والی بچیوں میں 14 سالہ مناہل، 10 سالہ ماہ نور، 8 سالہ ماہین اور 2 سالہ مہراب شامل تھیں۔

لاپتہ ہونے والی بچیوں کی ماں نے تھانے میں اپنی بچیوں کے اغوا کا مقدمہ درج کراتے ہوئے بیان میں بتایا کہ لوگوں کے گھروں میں کام کرکے واپس پہنچی تو بچیاں گھر میں نہیں تھیں، ہرجگہ تلاش کیا تاہم بچیوں کا نہیں پتہ چلا۔

ڈی آئی جی آپریشن ڈاکٹر محمد عابد خان کے حکم پر بچیوں کے اغوا کا مقدمہ درج کر لیا گیا۔ ڈی آئی جی انوسٹیگیشن شہزادہ سلطان کا کہنا ہے کہ بچیوں کو تلاش کرنے کی پوری کوشش کی جا رہی ہے۔ آئی جی پنجاب راؤ سردارعلی خان نے4 کم عمر بہنوں کے مبینہ اغواء کے واقعہ کا نوٹس لیتے ہوئے سی سی پی او لاہور سے واقعہ کی رپورٹ طلب کر لی، اور کہا کہ بچیوں کی باحفاظت بازیابی کیلئے تمام دستیاب وسائل بروئے کار لائے جائیں اور ملزمان کو جلد از جلد گرفتار کر کے سخت قانونی کارروائی کی جائے، ڈی آئی جی آپریشنز لاہور بچیوں کی والدہ کے ساتھ مسلسل رابطے میں رہیں اور تمام پہلوؤں پر تفتیش کرکے بچیوں کی جلد بازیابی کو یقینی بنایا جائے۔

دوسری جانب ڈی آئی جی آپریشنز نے بتایا کہ لاہور پولیس نے فوری کارروائی کرتے ہوئے بچیوں کو فیکٹری ایریا میں واقع ایک گھر سے بازیاب کروا لیا ہے، ابتدائی تحقیقات کے مطابق بچیاں اپنی مرضی سے رکشہ ڈرائیور کے گھر گئی تھیں، پولیس نے رکشہ ڈرائیور کو حراست میں لے لیا ہے۔ بچیوں کو عدالت میں پیش کر کے مزید قانونی کارروائی عمل میں لائی جائے گی۔