کپل شرما کے ساتھی کامیڈین نے زہر کھالیا

بھارت میں گزشتہ دو برسوں کے دوران کورونا کے باعث کئی چھوٹے فنکار شدید پریشان ہیں

ویب ڈیسک January 06, 2022

تیرتھ آنند راؤ گزشتہ 15 برس سے شوبز کی دنیا سے وابستہ ہیں فوٹوفائل

BANGKOK: بھارت کے معروف کامیڈین کپل شرما کے ساتھی اداکار تیرتھ آنند راؤ جو خود بھی کامیڈین ہیں نے زہر کھالیا۔

بھارت میں گزشتہ دو برسوں کے دوران کورونا کے باعث کئی چھوٹے فنکار شدید پریشان ہیں اور مالی مشکلات کا سامنا کررہے ہیں۔ کچھ فنکاروں نے تو اس مشکل صورتحال میں سوشل میڈیا پر دیگر فنکاروں سے مالی امداد کی درخواست بھی کی ہے۔ تاہم کچھ اس صورتحال سے اتنے دلبرداشتہ ہوئے کہ اپنی زندگی کا خاتمہ کرنے کی کوشش بھی کی۔

ان ہی میں سے ایک بھارتی کامیڈین تیرتھ آنند راؤ ہیں جنہوں نے کورونا کے باعث ہونے والی مالی پریشانیوں کے سبب زہر کھا لیا۔ بھارتی میڈیا کے مطابق تیرتھ آنند راؤ گزشتہ 15 برس سے شوبز کی دنیا سے وابستہ ہیں۔ وہ کامیڈین ہونے کے علاوہ معروف بھارتی اداکار نانا پاٹیکر کے ہمشکل کے طور پر بھی جانے جاتے ہیں۔

میڈیا رپورٹس کے مطابق تیرتھ آنند نے مالی مشکلات کی وجہ سے 27 دسمبر کو زہر کھاکر خودکشی کرنے کی کوشش کی۔ تاہم خوش قسمتی سے ان کے پڑوسیوں نے انہیں صحیح وقت پر اسپتال پہنچایا جس کی وجہ سے ان کی زندگی بچ گئی۔

تیرتھ آنند راؤ نے میڈیا سے بات کرتے ہوئے انتہائی قدم اٹھانے کے بارے میں بتایا کہ مالی مشکلات کے سبب ان کے گھروالوں نے بھی ان کا ساتھ چھوڑدیا۔ یہاں تک کہ اسپتال میں ان کی ماں اور بھائی بھی ان سے ملنے نہیں آئے۔

واضح رہے کہ تیرتھ آنند راؤ نے کپل شرما اور بھارتی ٹی وی کی معروف اداکارہ شوئیتا تیواری کے ساتھ ''کامیڈی سرکس کے عجوبے'' میں کام کیا تھا۔