سندھ کے نجی اسکولوں میں 12 تا 18 سال تک کے طلباء اور اسٹاف کی ویکسینیشن لازمی قرار

محکمہ تعلیم سندھ نے کورونا وائرس کے پھیلاؤ پر قابو پانے کے لئے نجی اسکولوں کو 12 تا 18 سال تک کی عمر کے طلباء اور تدریسی و غیر تدریسی عملے کی کورونا ویکسینیشن یقینی بنانے کے احکامات دے دئیے۔


ایکسپریس نیوز کے مطابق ڈائریکٹریٹ پرائیویٹ اسکولز سندھ نے نجی اسکولوں کے لئے مراسلہ جاری کر دیا ہے، نوٹیفکیشن کے مطابق نجی اسکولوں کو احکامات دئیے گئے ہیں کہ 12 تا 18 سال کے عمر تک کے طلبا کی کورونا ویکسینیشن کو یقینی بنایا جائے، جب کہ اسکول انتظامیہ تدریسی و غیر تدریسی عملے کی ویکسینیشن کو بھی یقینی بنائے، ویکسینیشن نہ کروانے والے اسکولوں کے خلاف کارروائی کی جائے گی۔

نوٹیفکیشن میں کہا گیا ہے کہ نجی اسکول انتظامیہ ویکسینیشن مکمل کرانے والے ملازمین کے کارڈ کا ڈیٹا مرتب کرے، انسپکشن کے دوران زیر ملازمت تدریسی و غیر تدریسی عملے کے رجسٹریشن کارڈ نہ ہونے پر کارروائی کی جائے گی۔