انگلش ٹیم زوال کی کھائی میں گر پڑی

آئی سی سی چیمپئن شپ میں آخری پوزیشن کارکردگی کا پول کھولنے لگی

Sports Reporter January 09, 2022

آئی سی سی چیمپئن شپ میں آخری پوزیشن کارکردگی کا پول کھولنے لگی۔ فوٹو: گیٹی

مسلسل شکستوں سے انگلش ٹیم زوال کی کھائی میں گر پڑی جب کہ آئی سی سی ٹیسٹ چیمپئن شپ میں آخری پوزیشن کارکردگی کا پول کھولنے لگی۔

آئی سی سی ٹیسٹ چیمپئن شپ میں بھارت کیخلاف سیریز میں 2شکستوں اور ایک فتح کے ساتھ اپنی مہم کا آغاز کرنے والی انگلش ٹیم اگلے امتحان میں بھی بْری طرح ناکام ہوئی، ایشز میں آسٹریلیا نے تینوں میچز میں مات دی،چوتھے میں بھی فتح کا امکان ظاہر نہیں کیا جاسکتا۔

دوسری جانب دیگر ٹیموں کی جانب سے بعض حیران کن نتائج سامنے آئے ہیں،جنوبی افریقہ نے ہوم سیریز میں بھارت کے مقابل پہلا میچ ہارنے کے بعد دوسرے میں بدلہ لے لیا،بنگلہ دیش نے آئی سی سی ٹیسٹ چیمپئن شپ کا اولین ٹائٹل جیتنے والے کیویز کو ان کے گھر میں ہی رسوا کردیا،اس صورتحال میں انگلینڈ کی ٹیم پوائنٹس ٹیبل پر نویں اور آخری پوزیشن پر آچکی ہے۔

تینوں ٹیسٹ جیت کر آسٹریلیا 100پرسنٹیج پوائنٹس کے ساتھ سر فہرست ہے،سری لنکا کے بھی اتنے ہی پوائنٹس مگر وہ معمولی فرق سے دوسرے نمبر پر ہے،پاکستان ٹیم 75پرسٹینج سے تیسری پوزیشن پر ہے، بھارت (55.21) چوتھے، جنوبی افریقہ (50.00) پانچویں، بنگلہ دیش (33.33) چھٹے، ویسٹ انڈیز (25.00) ساتویں، نیوزی لینڈ(11.11) آٹھویں اور انگلینڈ (07.14) نویں نمبر پر ہے۔

ایشز کا چوتھا ٹیسٹ ڈرا ہونے کی صورت میں انگلش ٹیم کے پرسنٹیج پوائنٹس صرف 10ہوسکتے ہیں،بظاہر ناممکن نظر آنے والی فتح کی صورت میں 19پوائنٹس کیساتھ پوزیشن میں ایک درجہ بہتری آسکتی ہے،ابھی تک 2میچز میں شکست اور ایک ڈرا نے نیوزی لینڈ کو بھی سخت دباؤکا شکار کردیا،نویں پوزیشن اس کا مقدر بن سکتی ہے۔