نواب شاہ قائد عوام یونیورسٹی کی 2 تنظیموں میں تصادم 2 طلبہ زخمی 2 گرفتار

قائدعوام انجینئرنگ یونیورسٹی نواب شاہ کی طلبہ تنظیموں کے کارکنان میڈیکل کالج اسپتال کے مین گیٹ کے قریب اچانک آمنے سامنے آگئے جس پر دونوں میں مسلح تصادم شروع ہوگیا۔


فائرنگ سے اسپتال روڈ پر افراتفری مچ گئی، 20 سالہ معیز جمالی اور 22 سالہ حسن ھکڑو گولیاں لگنے سے شدید زخمی ہوگئے جنھیں پی ایم سی اسپتال داخل کرایا گیا۔ واقعے کے بعد قائد عوام یونیورسٹی میں شدید کشیدگی پھیل گئی۔ ایک طلبا تنظیم کے درجنوں کارکن اسپتال پہنچ گئے اور انھوں نے شعبہ حادثات میں ہنگامہ آرائی کرکے توڑ پھوڑ کی اور طبی عملے کو زود وکوب کیا جس پر ڈاکٹرز اور پیرا میڈیکل اسٹاف نے احتجاجاً ہڑتال کر دی۔ تصادم کی اطلاع پر پولیس کی بھاری نفری جائے وقوعہ پہنچی اور اسپتال میں توڑ پھوڑ کرنے والے 2 طلبا کو گرفتار کر لیا۔ اے سیکشن پولیس نے رپورٹ درج کرکے حملہ آور ملزمان کی تلاش شروع کر دی ہے۔