نیب مالم جبہ اور بلین ٹری سونامی کی انکوائری رپورٹ جمع کرائے پشاور ہائیکورٹ

عدالت نے قومی احتساب بیورو (نیب) کو مالم جبہ، بلین ٹری سونامی اور بینک آف خیبر سے متعلق انکوائری رپورٹ جمع کرنے کا حکم دے دیا۔

پشاور ہائیکورٹ میں مالم جبہ، بلین ٹری سونامی اور بینک آف خیبر سے متعلق انکوائری کے حوالے سے کیس کی سماعت ہوئی۔

دوران سماعت مذکورہ معاملے کے درخواست گزار کے وکیل علی گوہر درانی نے کہا کہ عدالت نے نیب کو رپورٹ جمع کرنے کا حکم دیا تھا لیکن ابھی تک رپورٹ جمع نہیں کرائی گئی۔

مزیدپڑھیں: بلین نہیں بلکہ ''ٹریلین ٹری سونامی'' کی ضرورت ہے، اقوامِ متحدہ

جس پر نیب پراسیکیوٹر عظیم داد نے کہا کہ دو رپورٹس ہے، بلین ٹری سونامی رپورٹ تقریبا تیار ہے وہ جلد جمع کرادی جائیں گی۔

اس پر جسٹس روح الامین نے ریمارکس دیے کہ عدالت نے دو نہیں 3 رپورٹ جمع کرنے کا حکم دیا تھا، عدالت نے حکم دیا تھا کہ یہ 2 ڈپارٹمنٹس کے درمیان مسلہ ہے مل بیٹھ کر اس کو حل کریں۔


جسٹس روح الامین نے مزید ریمارکس دیے کہ عدالت نے انکوائری بند کرنے کا نہیں کہا، مسلہ حل کرنے کی بجائے نیب نے انکوائری ہی بند کردی۔

عدالت کی جانب سے برہمی کا اظہار کیا گیا کہ کس طرح نیب حکام نے عدالتی حکم کو بنیاد بنا کر مالم جبہ کیس کی انکوائری بند کردی، عالت نے انکوائری جاری رکھنے کی ہدایت کی تھی۔

یہ بھی پڑھیں: 'بلین ٹری سونامی' منصوبہ نہایت کامیاب رہا، سپارکو نے تصدیق کردی

 

نیب پراسیکیوٹر نے کہا کہ بلین سونامی ٹریز کے خلاف بھی 10 انکوائریز چل رہی ہیں جبکہ ایک ریفرنس دائر کردیا ہے۔

بعدازاں عدالت نے نیب کو مالم جبہ، بلین ٹری سونامی اور بینک آف خیبر کی انکوائری رپورٹ 26 جنوری تک جمع کرنے کا حکم دیتے ہوئے سماعت بھی 26 جنوری تک ملتوی کردی۔