ایف آئی اے نے حریم شاہ کے خلاف منی لانڈرنگ کی تحقیقات شروع کردیں

حریم شاہ نے دعویٰ کیا کہ وہ بھاری رقم لے کر باآسانی پاکستان سے باہر گئیں (فوٹو اسکرین گریپ)

---

وفاقی تحقیقاتی ادارے (ایف آئی اے) نے ویڈیو وائرل ہونے کے بعد حریم شاہ کے خلاف منی لانڈرنگ کی تحقیقات شروع کردیں۔

ایکسپریس نیوز کے مطابق متنازع ٹک ٹاکر کی گزشتہ روز سماجی رابطے کی ویب سائٹس پر ایک ویڈیو وائرل ہوئی جس میں وہ بھاری رقم کی منتقلی کا اعتراف کررہی تھیں۔

اب ایف آئی اے نے اس ویڈیو کا نوٹس لیتے ہوئے حریم شاہ کے خلاف منی لانڈرنگ کی تحقیقات شروع کرنے کا فیصلہ کیا ہے۔

ترجمان ایف آئی اے سندھ کے مطابق حریم شاہ کا اصل نام فضا حسین ہے، جنہوں نے 10 جنوری کی رات کراچی انٹرنیشنل ایئرپورٹ سے قطر (دوحا) کیلئے سفر کیا تھا اور منی لانڈرنگ سے متعلق ایک ویڈیو بنا کر شیئر کی۔

ایف آئی اے نے حریم شاہ کے ویزے، امیگریشن اور سفری دستاویزات کی تفصیلات حاصل کر کے برطانیہ کی نیشنل کرائم ایجنسی کو خط لکھنے کا فیصلہ کیا، جس میں ٹک ٹاکر کے خلاف کارروائی کی استدعا بھی کی جائے گی۔

مزید پڑھیں: والدین کی دعاؤں کے صلے میں حریم شاہ جیسی بیوی ملی، بلال شاہ

ترجمان ایف آئی اے نے بتایا کہ حریم شاہ کے خلاف فارن ایکسچینج قوانین کے تحت تحقیقات اور کارروائی کا آغاز کردیا جس کے سلسلے میں پاکستان کسٹمز اور ایئرپورٹ سیکیورٹی فورس سے معلومات حاصل کی گئیں۔

حکام کا کہنا ہے کہ غیر قانونی طریقے سے کرنسی کی منتقلی منی لانڈرنگ کے زمرے میں آتی ہے۔

Hareem Shah reaches London pic.twitter.com/aehGbDLGJC

- Murtaza Ali Shah (@MurtazaViews) January 12, 2022

قبل ازیں حریم شاہ کی ایک ویڈیو انٹرنیٹ پر وائرل ہوئی جس میں انہوں نے بتایا کہ وہ پہلی بار بھاری رقم لے کر لندن پہنچ گئیں ہیں اور انہیں پاکستان کے ایئرپورٹ پر کسی نے نہیں روکا اور نہ روک سکتا ہے۔ ٹک ٹاکر نے کہا کہ پاکستان میں قانون صرف غریب کے لیے ہے۔