ٹیسٹ کرکٹ ٹیم پاکستان کا دورہ ضرور کرے گی آسٹریلوی کپتان

بیشتر کھلاڑی دورۂ پاکستان کے لیے تیار ہیں، پی سی بی نے شاندار اقدامات کیے ہیں، پیٹ کمنز

ویب ڈیسک January 13, 2022

دورہ پاکستان میں سب کچھ مثبت ہوگا، آسٹریلوی کپتان (فائل فوٹو)

QUETTA: آسٹریلیا کی ٹیسٹ کرکٹ ٹیم کے کپتان اور فاسٹ بولر پیٹ کمنز نے کہا ہے کہ ٹیسٹ ٹیم پاکستان کا دورہ ضرور کرے گی۔

آسٹریلوی میڈیا کے مطابق پیٹ کمنز اپنے اسکواڈ کے ساتھ رواں سال مارچ اپریل میں دورہ پاکستان کے لیے پُرامید اور انتہائی پُرجوش ہیں۔

پیٹ کمنز نے پی سی بی کے اقدامات کی تعریف کرتے ہوئے کہا کہ 'پاکستان کرکٹ بورڈ نے شاندار اقدامات کیے پھر بھی اگر چند کھلاڑی دورے پر راضی نہیں تو یہ اُن کی مرضی ہے جبکہ سب کچھ اب اچھی طرح سے آگے بڑھ رہا ہے'۔

انہوں نے کہا کہ 'میں دورۂ پاکستان کے لیے پُرامید اور مثبت ہوں کیونکہ یقین ہے کہ اس سے ہمیں بہت کچھ سیکھنے اور شائقین کو دیکھنے کو ملے گا'۔

مزید پڑھیں: آسٹریلوی ٹیم کودورہ پاکستان کا مشورہ مل گیا

ٹیسٹ کرکٹ ٹیم کے کپتان نے واضح کیا کہ بیشتر کھلاڑی دورۂ پاکستان کے لیے تیار ہیں تاہم اگر چند نہ بھی گئے تو اس سے کوئی مسئلہ نہیں ہوگا'۔

واضح رہے کہ آسٹریلیا کی ٹیم رواں سال مارچ میں پاکستان کا دورہ کرے گی، اس دوران دونوں ٹیموں کے درمیان 3 ٹیسٹ، تین ون ڈے انٹرنیشنل میچز کی سیریز جبکہ ایک ٹی ٹوینٹی میچ کھیلا جائے گا۔

آسٹریلیا اور پاکستان کی ٹیموں کے درمیان کراچی، راولپنڈی اور لاہور میں ٹیسٹ کھیلے جائیں گے جبکہ ون ڈے اور ٹی ٹوینٹی قذافی اسٹیڈیم میں ہوگا۔