عبدالرشید غازی قتل کیس پرویز مشرف کو ایک دن کیلئے حاضری سے استثنیٰ مل گیا

پرویز مشرف کے وکیل الیاس صدیقی عبدالرشیدغازی کیس سے الگ ہوگئے۔ فوٹو: فائل

---

مقامی عدالت نے عبدالرشید غازی قتل کیس میں پرویز مشرف کو ایک دن کے لئے حاضری سے استثنیٰ دیتے ہوئے اگلی سماعت میں پیشی کا حکم دے دیا ہے۔

اسلام آباد کی ایڈیشنل سیشن کورٹ میں عبدالرشید غازی قتل کیس کی سماعت ہوئی۔ سماعت کے دوران پرویز مشرف کے وکیل الیاس صدیقی پیش نہیں ہوئے تاہم اختر شاہ ایڈووکٹ نے سابق صدر کی جانب سے اپنا وکالت نامہ جمع کرایا۔ اختر شاہ ایڈووکیٹ نے عدالت سے استدعا کی کہ ان کے موکل کو آج کے دن حاضری سے استثنیٰ دیا جائے جسےعدالت نے منظور کرلیا۔

عدالت نے کیس کی سماعت یکم مارچ تک ملتوی کرتے ہوئے اگلی سماعت پر سابق صدر کو پیش ہونے کا حکم دے دیا، اس کے علاوہ عدالت نے پولیس کو آئندہ سماعت سے قبل مقدمے کا نیا ضمنی چالان بھی داخل کرنے کی ہدایت کردی۔