پینشن وصولی کے لیے مردہ شخص پوسٹ آفس پہنچ گیا

عملے کے استفسار پر دونوں نوجوان بھاگ کھڑے ہوئے اور 60 سال کے لگ بھگ شخص کو وہیں چھوڑ گئے جو بعد میں پتہ چلا مردہ تھا

ویب ڈیسک January 23, 2022

وہ پوسٹ آفس جہاں بوڑھے شخص کی لاش کو لایا گیا

QUETTA: آئر لینڈ کی پولیس ایک عجیب و غریب واقعے کی تحقیقات میں مصروف ہے جس میں ایک مُردہ شخص کو اُس کی پینشن وصول کرنے کے لیے باقاعدہ طور پر پوسٹ آفس لایا گیا۔

آئرش ٹائمز کے مطابق آئرلینڈ کے قصبے کارلو میں 2 نوجوان ایک بوڑھے مرد کے بےجان جسم کو سہارا دیے ہوئے مقامی پوسٹ آفس میں داخل ہوئے۔ عملے کی جانب سے جب استفسار کیا گیا تو دونوں نوجوان بھاگ کھڑے ہوئے اور 60 سال کے لگ بھگ شخص کو وہیں چھوڑ گئے جو کہ بعد میں پتہ چلا کہ مُردہ تھا۔

آئرلینڈ کی نیشنل پولیس فورس کا کہنا ہے کہ فی الوقت تحقیقات کا مرکز بوڑھے شخص کی موت ہے، لاش کو پوسٹ مارٹم کے لیے بھیجا جائے گا تاکہ پتا لگایا جاسکے کہ آدمی کی موت کیسے ہوئی۔

آئرش ٹائمز کے مطابق جو دو نوجوان لاش کو لائے تھے اُن میں سے ایک نے پوسٹ آفس کے کاؤنٹر پر کسی کی پینشن وصول کرنے کے بارے میں پوچھا تھا جس پر جواب دیا گیا تھا کہ جس کی پینشن ہے اُسے موجود ہونا لازمی ہے، بعد میں دونوں نوجوان پینشن کے حق دار شخص کی لاش پوسٹ آفس لے آئے۔