سلمان خان سدھارتھ کی یاد میں آبدیدہ ہوگئے

بگ باس 15 کے گرینڈ فنالے کا ‘پرومو’ جاری کردیا گیا ہے

ویب ڈیسک January 29, 2022

سلمان خان بھی سدھارتھ کی یاد میں اپنے جذبات پر قابو نہ رکھ سکے (فوٹو، انٹرنیٹ)

لاہور: بالی ووڈ اسٹار سلمان خان اور اداکارہ شہناز گِل آنجہانی اداکار سدھارتھ شُکلا کی یاد میں گلے لگ کر رو پڑے۔

بھارت کے مقبول ترین ریئلٹی شو 'بگ باس' کے میزبان سلمان خان بھی سدھارتھ کی یاد میں اپنے جذبات پر قابو نہ رکھ سکے، شہناز گل کے ہمراہ ان کی آنکھیں بھی بھر آئیں۔

میڈیا رپورٹ کے مطابق بگ باس 15 کے گرینڈ فنالے کا 'پرومو' جاری کیا گیا جس میں سلمان خان اور شہناز گل آبدیدہ نظر آرہے ہیں۔

مختصر ویڈیو میں دیکھا جاسکتا ہے کہ میزبان کے بلانے پر ماڈل واداکارہ شہناز اسٹیج پر آئیں، سلمان خان کے سوال پر شہناز گل نے بتایا کہ وہ دبنگ خان کو دیکھ کر گھبراہٹ کا شکار ہورہی ہیں۔

View this post on Instagram

A post shared by Biggboss 15 Spy 🕵️‍♂️ (@biggboss15spy)

بعد ازاں اسٹیج پر ہی سدھارتھ کی یاد میں شہناز گل کی آنکھوں میں آنسو آگئے جس پر سلمان خان نے دلاسے کے لیے انہیں گلے لگایا اور پھر وہ بھی اپنے جذبات پر قابو نہ رکھ سکے۔

خیال رہے کہ شہناز گل بگ باس 13 کے فاتح آنجہانی اداکار سدھارتھ کو بگ باس 15 کے فائنل میں خراج تحسین پیش کریں گی اس سبب انہیں گرینڈ فنالے میں خصوصی شرکت کی دعوت دی گئی۔

یاد رہے کہ گزشتہ سال دو ستمبر کو سدھارتھ شکلا 40 برس کی عمر میں اچانک دل کا دورہ پڑنے کے باعث چل بسے تھے۔