شکارپور میں خاندانی دشمنی پر پیش امام سمیت 3 افراد قتل

شکارپور میں پانچ مسلح ملزمان اندھا دھند فائرنگ کرکے فرار ہوگئے

ویب ڈیسک January 30, 2022

اس قتل کا خاندانی دشمنی کا شاخسانہ قرار دیا گیا ہے (فوٹو، فائل)

لاہور: صوبہ سندھ کے شہر شکارپور کے علاقے حبیب جکرو میں خاندانی دشمنی پر پیش امام سمیت تین افراد کو قتل کردیا گیا۔

ایکسپریس نیوز کے مطابق حبیب جکرو میں نامعلوم افراد کی فائرنگ سے پیش امام ارشاد علی منگرانی، دلشاد منگرانی اور شمن ککرانی جاں بحق ہوئے، اس قتل کو خاندانی دشمنی کا شاخسانہ قرار دیا گیا ہے۔

فائرنگ کے بعد زخمیوں کو تعلقہ اسپتال منتقل کیا گیا جہاں ڈاکٹروں نے تینوں کی موت کی تصدیق کردی۔

پولیس حکام کے مطابق منگرانی برداری کے دو گروپوں میں جاری پرانی خاندانی دشمنی کے باعث یہ واقعہ پیش آیا، پانچ مسلح ملزمان فائرنگ کرکے موقع سے فرار ہوگئے۔

ایس پی تنویر تنیو کا کہنا تھا کہ فرار ہونے والے ملزمان کی گرفتاری کے لیے علاقے میں ناکہ بندی کردی گئی جبکہ پولیس سرچ آپریشن بھی کررہی ہے۔