الیکشن قوانین کی خلاف ورزی پر مولانا فضل الرحمان کے بھائی کو نوٹس جاری

الیکشن کمیشن نے ضیاء الرحمان کو ڈی آئی خان کے ضلعی دفتر میں 5 فروری کو طلب کر لیا

ویب ڈیسک February 04, 2022

مولانا فضل الرحمان کے بھائی ضیاالرحمان سرکاری افسر ہیں۔ فوٹو:فائل

MELBOURNE: الیکشن کمیشن نے جے یو آئی کے سربراہ مولانا فضل الرحمان کے بھائی کو بلدیاتی الیکشن کی انتخابی ضابطہ اخلاق کی خلاف ورزی پر نوٹس جاری کردیا۔

ایکسپریس نیوز کے مطابق الیکشن کمیشن نے ڈیرہ اسماعیل خان میں ہونے والے انتخابات کے ضابطہ اخلاق کی خلاف ورزی پر سربراہ جے یو آئی مولانا فضل الرحمان کے بھائی ضیاالرحمان کو نوٹس جاری کردیا جب کہ انہیں ڈی آئی خان کے ضلعی دفتر میں 5 فروری کو طلب بھی کرلیا ہے۔

اس خبرکوبھی پڑھیں: وفاقی وزیرعلی امین گنڈا پور الیکشن کمیشن طلب

الیکشن کمیشن کی جانب سے جاری نوٹس میں کہا گیا ہے کہ انتخابی مواد پر آپ کی تصاویر چھپی ہوئی ہیں، جب کہ آپ بطور سرکاری افسر کسی بھی طرح الیکشن مہم میں حصہ نہیں لے سکتے، آپ نے 3 فروری کو ایک امیدوار کے سیاسی اجتماع سے بھی خطاب کیا، انتخابی ضابطہ اخلاق ورزی پر جواب دینے کے لئے 5 فروری کو الیکشن کمیشن کے دفتر میں پیش ہوں۔

الیکشن کمیشن کی جانب سے ضیاء الرحمان کو دعوت دینے والے جے یو آئی امیدوار کفیل نظامی کو بھی نوٹس جاری کیا گیا ہے، اور انہیں نوٹس میں کہا گیا ہے کہ ڈی آئی خان میں جے یو آئی کے امیدوار کفیل نظامی 5 فروری کو ڈی ایم او کے دفتر پیش ہوں۔