ایوب نیشنل پارک میں پیدا ہونے والے بنگال ٹائیگرز کے بچوں کی نمائش

ایوب نیشنل پارک کے جنگل ورلڈ میں بنگال ٹائیگر کے پیدا ہونے والے 2 بچوں کی نمائش کا سلسلہ شروع ہوگیا ہے۔


بنگال ٹائیگر کے بچوں کے نام فیلیکس اور جولیا ہیں اور انہیں ایوب پارک جنگل ورلڈ میں آنے والے سیاح باآسانی دیکھ سکیں گے، شیر کے بچوں کو روزانہ 2500 سیاح دیکھ سکیں گے۔

اس حوالے سے بنگال ٹائیگر کی نایاب نسل کے بچوں کو پبلک کے سامنے پیش کرنے کے موقع پر ایوب نیشنل پارک میں پروقار تقریب کا انعقاد کیا گیا اس موقع پر ڈی جی آرمی ہیریٹیج فاؤنڈیشن بریگیڈئیر (ر) محمد آصف حیات نے کہا کہ دنیا میں صرف 3 ہزار 500 بنگال ٹائیگرز موجود ہیں جن میں سے 5 ٹائیگر ایوب پارک کے پاس موجود ہیں جبکہ لاہور سے بھی 8 بنگال ٹائیگرز جلد ایوب نیشنل پارک منتقل کردیے جائیں گے۔