لتا منگیشکر کی وفات سے برصغیر نے ایک عظیم گلوکارہ کو کھو دیا وزیراعظم

لتا منگیشکر کے انتقال پر سیاسی رہنماؤں نے بھی افسوس کا اظہار کیا

ویب ڈیسک February 06, 2022

لتا کے گانوں کو سن کر لوگوں کو بہت خوشی ملی، وزیراعظم عمران خان (فوٹو انٹرنیٹ)

CHARSADDA: وزیراعظم عمران خان نے لتا منگیشکر کی موت پر افسوس کا اظہار کرتے ہوئے کہا ہے کہ اُن کے گانوں کو سن کر لوگوں کو بہت خوشی ملی، برصغیر نے حقیقی معنوں میں عظیم گلوکارہ کو کھودیا۔

وزیراعظم عمران خان نے سماجی رابطے کی ویب سائٹ ٹویٹر پر لتا منگیشکر کے انتقال کے حوالے سے تعزیتی بیان جاری کیا، جس میں انہوں نے کہا کہ لتا منگیشکر کی وفات سے برصغیر نے حقیقی معنوں میں ایک عظیم گلوکارہ کو کھو دیا ہے۔ انہوں نے کہا کہ لتامنگیشکر کو دنیا جانتی ہے، ان کے گانوں کو سن کر لوگوں کو بہت خوشی ملی۔

لتا منگیشکر کی وفات سے برصغیر صحیح معنوں میں دنیائے موسیقی کی عظیم آوازوں میں سے ایک سے محروم ہو گیا۔ ان کی آواز اور گانے دنیا بھر میں بے شمار لوگوں کی تفریحِ طبع کا وسیلہ بنے۔

- Imran Khan (@ImranKhanPTI) February 6, 2022

دوسری جانب وفاقی وزیر داخلہ شیخ رشید احمد نے لتا منگیشکر کی موت پر افسوس کا اظہار کرتے ہوئے کہا کہ افسوس، کئی دہائیوں سے راج کرتی برصغیر کی ایک انمول آواز آج دنیا سے رخصت ہوگئی۔ انہوں نے کہا کہ فنکاراس عارضی دنیا سے چلا جاتا ہے مگراس کا فن ہمیشہ یاد رہتا ہے۔

مزید پڑھیں: بھارتیوں نے شاہ رخ پر لتا منگیشکر کی میت پر تھوکنے کا الزام عائد کردیا

شیخ رشید احمد نے کہا کہ لتا منگیشکر اپنے گیتوں اور سروں سے ہمیشہ ہمارے درمیان موجود رہیں گیں۔ علاوہ ازیں لیجنڈری گلوکارہ لتا منگیشکر کی موت پر پاکستانی سیاستدانوں نے افسوس کا اظہار کرتے ہوئے ان کی موت کو موسیقی کے ایک عہد کا خاتمہ قرار دیا ہے۔

6 فروری 2022 کو کورونا کی وجہ سے ہونے والی پیچیدگیوں کے باعث ممبئی کے بریچ کینڈی اسپتال میں اپنی زندگی کی آخری سانسیں لینے والی برصغیر کی لیجنڈری گلوکارہ لتامنگیشکر کی موت پر سب ہی افسردہ ہیں۔

In the passing of Lata Mangeshkar, the world of music has lost a singing legend who mesmerized generations with her melodious voice. The people of my generation grew up listening to her beautiful songs that will remain part of our memory. May she rest in peace!

- Shehbaz Sharif (@CMShehbaz) February 6, 2022

وزیراطلاعات فواد چوہدری نے ٹوئٹر پر لتا منگیشکر کی موت کو موسیقی کے ایک عہد کا خاتمہ قرار دیتے ہوئے کہا لتا جی نے عشروں تک سُر کی دنیا پر حکومت کی اور ان کی آواز کا جادو رہتی دنیا تک رہے گا، جہاں جہاں اردو بولی اور سمجھی جاتی ہے وہاں لتا منگیشکر کو الوداع کہنے والوں کا ہجوم ہے۔

قائد حزب اختلاف شہباز شریف نے بھی سُروں کی ملکہ لتا منگیشکر کی موت پر دکھ کا اظہار کرتے ہوئے کہا لتا منگیشکر کے انتقال سے موسیقی کی دنیا ایک ایسے گلوکار سے محروم ہوگئی جس نے اپنی سُریلی آواز سے نسلوں کو مسحور کیا۔ میری نسل کے لوگ ان کے خوبصورت گانے سنتے ہوئے بڑے ہوئے جو ہماری یادوں کا حصہ رہیں گے۔

لتا منگیشکر کا انتقال موسیقی کے ایک عہد کا خاتمہ ہے، لتا جی نے عشروں تک سر کی دنیا پر حکومت کی اور ان کی آواز کا جادو رہتی دنیا تک رہے گا، جہاں جہاں اردو بولی اور سمجھی جاتی ہے وہاں لتا منگیشکر کو الوداع کہنے والوں کا ہجوم ہے، #LataMangeshkar

- Ch Fawad Hussain (@fawadchaudhry) February 6, 2022

پاکستان پیپلزپارٹی کے چیئرمین بلاول بھٹو زرداری نے بھی گلوکارہ لتا منگیشکر کی وفات پر اظہار افسوس کیا ہے۔ انہوں نے کہا نصف صدی سے زائد اپنی آواز کا جادو جگا کر لتا منگیشکر نے کروڑوں انسانوں کو اپنے سنگیت کا گرویدہ بنایا۔

یہ بھی پڑھیں: ملکہ ترنم نورجہاں نے لتا منگیشکر کے متعلق کیا پیش گوئی کی تھی؟

آنجہانی لتا منگیشکر برصغیر میں موسیقی کی ایک پہچان تھیں، فلمی صنعت کے لئے ان کی خدمات ناقابل فراموش ہیں۔ لتا منگیشکر کے گیت، ان کے نغمے اور سُر کبھی فراموش نہیں کئے جاسکیں گے۔ لتا منگیشکر کی وفات دنیا بھر میں ان کے پرستاروں کے لئے ایک گہرا صدمہ ہے۔

وزیر اعلی پنجاب سردار عثمان بزدارنے گلوکارہ لتا منگیشکر کے انتقال پر افسوس کا اظہار کرتے ہوئے کہا لتا منگیشکر کے انتقال سے فن موسیقی کے ایک عہد کا خاتمہ ہوا ہے۔ لتا منگیشکر کا گلوکاری میں کوئی ثانی نہیں تھا۔ سُر، تان کی ملکہ لتا منگیشکر نے فلم نگری پر طویل عرصہ راج کیا۔ لتا منگیشکر نے کئی دہائیوں تک آواز کا جادو جگایا۔