ایم کیوایم کا وفد کل شہباز شریف سے ملاقات کرے گا

ایم کیوایم اورشہباز شریف کی ملاقات میں بلدیاتی انتخابات سمیت دیگرامورپربات ہوگی

Staff Reporter February 07, 2022

ایم کیوایم کا وفد لاہورمیں چوہدری پرویز الہی سے بھی ملاقات کرے گا:فوٹو:فائل

KARACHI/LAHORE: وفاقی حکومت کی اتحادی جماعت ایم کیوایم پاکستان کا وفد کل ماڈل ٹاؤن میں شہبازشریف سے ملاقات کرے گا۔

ذرائع کے مطابق ایم کیو ایم پاکستان کا وفد عامر خان کی قیادت میں اپوزیشن لیڈر و صدر(ن) لیگ شہباز شریف سے کل ماڈل ٹاؤن لاہور میں ملاقات کرے گا۔ملاقات میں سیاسی صورتحال ، بلدیاتی انتخابات ، شہری سندھ کے مسائل سمیت دیگر اہم امور پر بات چیت ہوگی۔

(ن) لیگ اور ایم کیو ایم ملاقات میں ان ہاؤس تبدیلی کے حوالے سے تبادلہ خیال کا بھی امکان ہے۔

ملاقات میں (ن) لیگ اور ایم کیو ایم کے تعلقات اور مستقبل کی حکمت عملی سمیت سندھ میں گورننس اور بلدیاتی معاملات پر ساتھ چلنے پر بھی بات چیت ہوگی۔

بلدیاتی خود مختاری اور اختیارات کی نچلی سطح تک منتقلی اور سپریم کورٹ کے فیصلے کے حوالے سے بھی معاملات پر تبادلہ خیال ہوگا۔

ایم کیو ایم کا وفد لاہورمیں چوہدری شجاعت حسین کی عیادت کرے گا اورچوہدری پرویز الہی سے ملاقات کرے گا۔چوہدری پرویز الہی سے ملاقات میں بلدیاتی امورسیمت دیگراہم معاملات پربات کی جائیگی۔

ایم کیو ایم پاکستان کا کہنا ہے کہ ہم سیاسی لوگ ہیں سیاسی رابطے کرنا کوئی ایسی بات نہیں کہ اس پر شکوک پیدا ہوں۔بات چیت کے دروازے اور راستے سب کے لیے کھلے رکھنے چاہئیں۔