عمران خان اپنی خیر منائیں ان کی کشتی ڈوب رہی ہے مریم نواز

تاریخ کی کرپٹ ترین حکومت عمران خان کی حکومت ہے،مریم نواز

---

ISLAMABAD: پاکستان مسلم لیگ (ن) کی نائب صدر مریم نواز نے کہا ہے کہ عمران خان اپنی خیر منائیں ان کی کشتی ڈوب رہی ہے۔

اسلام آباد میں میڈیا سے گفتگو کرتے ہوئے مریم نواز نے کہا کہ عمران خان کی پارٹی ایسی نہیں جس میں کوئی آئیڈیالوجی ہو، نظریاتی لوگ ہوں یا کوئی کمٹمنٹ ہو، ہمیں پی ٹی آئی کی کشتی ڈوبتی نظر آرہی ہے، اس پارٹی میں شامل سب لوگ اقتدار کے خواہش مند ہیں جب اقتدار کی کشتی ڈوبے تو یہ لوگ کہیں نظر نہیں آئیں گے۔

''عوام کے ہاتھ آپ کے گریبان تک پہنچنے والے ہیں''

انہوں نے کہا کہ عمران خان اور ان کی جماعت کو مخلصانہ مشورہ ہے کہ وہ جب بھی عوام میں جائیں تو ہیلمٹ لے کر جائیں چاہیں تو کنٹینر پر چڑھ جائیں کیوں کہ عوام کے ہاتھ آپ کے گریبان تک پہنچنے والے ہیں۔

''عوام پر جو عذاب مسلط ہے اس سے نجات دلائی جائے گی''

مریم نواز کا کہنا تھا کہ ہماری ترجیح عوام ہیں اور یہ سیاسی جماعتوں کا فرض ہے کہ عوام پر جو عذاب مسلط ہوا ہے اس سے ملک و قوم کو نجات دلائی جائے، اگر اپوزیشن نے عوام کی آواز پر لبیک نہ کہا تو حکومت کے ساتھ ساتھ سیاسی جماعتیں بھی قصور وار ہوں گی، عوام کی بھلائی کےلیے کام کرنا یہ سب سے بڑی ذمہ داری ہے۔

''عمران خان کے ارکان دوسرے جماعتوں میں جانے کے لیے تیار ہیں''

انہوں نے کہا کہ عمران خان کو اپنے اقتدار کی کشتی ڈوبتی ہوئی نظر آرہی ہے تو ان کی چیخیں نکلتی ہیں، ان کے ایم این اے اور ایم پی اے دوسرے جماعتوں میں جانے کے لیے تیار ہیں، نواز شریف ابھی وطن واپس نہیں آسکتے لیکن پوری جماعت ان کی لیڈرشپ میں متحد رہی ہے۔

مزید پڑھیں: مریم نواز کے دستخط اور کیلبری فونٹ والی ٹرسٹ ڈیڈ کو جعلی نہیں کہہ سکتے، اسلام آباد ہائی کورٹ

انہوں نے کہا کہ نوازشریف کی جماعت آج اپنی جگہ پر قائم و دائم اور پہلے سے زیادہ مضبوط ہے جبکہ عمران خان اقتدار جاتا دیکھ کر فرسٹریشن کے شکار ہوکر تقاریر کرتے ہیں۔

''نیب کے پاس آج عدالت میں کوئی جواب نہیں تھا''

مسلم لیگ (ن) کی نائب صدر نے کہا کہ نیب کے پاس آج عدالت میں کوئی جواب نہیں تھا اللہ تعالیٰ نے دودھ کا دودھ اور پانی کا پانی کردیا۔

''پی ٹی آئی رہنماؤں کو چاہئے اپنے حلقوں میں حکومت کو سپورٹ نہ کریں''

انہوں نے کہا کہ دہشت گردی، مہنگائی اور عوامی غصے کی وجہ سے حالات بدلے ہیں اور کوئی وجہ نہیں، تحریک انصاف کے رہنماؤں کو پیغام ہے کہ اگر وہ باعزت اپنے حلقوں میں جانا چاہتے ہیں تو اس حکومت کو سپورٹ نہ کریں۔

''اپوزیشن جماعتوں کو پہلا مرحلہ تحریک عدم اعتماد کا درپیش ہے''

ایک سوال پر ان کا کہنا تھا کہ اپوزیشن جماعتوں کو پہلا مرحلہ تحریک عدم اعتماد کا درپیش ہے، بعد میں وزیراعظم کون ہوگا یہ کہنا قبل از وقت ہے یہ باتیں بعد کی ہیں اور بعد میں ہی طے ہوں گی۔

''عمران خان کی تاریخ کی کرپٹ ترین حکومت ہے''

وزیراعظم کی جانب سے 10 وزارتوں کو انعام دینے کے سوال پر انہوں نے کہا کہ تاریخ کی کرپٹ ترین حکومت عمران خان کی حکومت ہے، انہیں مشورہ ہے کہ وہ عوامی رابطوں میں (ن) لیگ کو چور ڈاکو کہنے کے بجائے عوام کو یہ بتائیں کہ عدالتوں میں (ن) لیگ کے حق میں کیا گواہیاں آرہی ہیں۔