شمالی وزیرستان میں فوجی چوکی پر خود کش حملہ ناکام دہشت گرد ہلاک

شمالی وزیرستان کے علاقے دوسالی میں سیکیورٹی فورسز نے فوجی چوکی پر خود کش حملے کی کوشش ناکام بنا دی جس کے نتیجے میں ایک دہشت گرد ہلاک ہوگیا۔

پاک فوج کے شعبہ تعلقات عامہ (آئی ایس پی آر) کے مطابق ہلاک ہونے والے دہشت گرد کی شناخت شریف کے نام سے ہوئی ہے جو سیکورٹی فورسز کے خلاف دہشت گردی کی کارروائیوں میں سرگرم عمل رہاہے۔


آئی ایس پی آر کے مطابق دہشت گرد نے چھوٹے ہتھیاروں سے فائرنگ اور دستی بم پھینکنے کی کوشش کی جبکہ ہلاک دہشت گرد سے اسلحہ اور گولہ بارود بھی برآمد ہوا ہے

آئی ایس پی آر کے مطابق سیکیورٹی فورسز نے الرٹ اور صورتحال کے لیے تیار رہتے ہوئے فوری جوابی کارروائی شروع کی اور دہشت گردوں کو موٴثر طریقے سے روک دیا۔

بیان میں کہا گیا کہ علاقہ مکینوں نے دہشت گردی کی لعنت کے خاتمے کے لیے بھرپور تعاون کاعزم ظاہر کیا اور مقامی لوگوں نے سیکیورٹی فورسز کے فوری ردعمل کو سراہا ہے۔