بل گیٹس کو ہلال پاکستان ایوارڈ عطا کردیا گیا

وزیراعظم عمران خان اور بل گیٹس کے درمیان ملاقات کا منظر (فوٹو : آئی این پی)

---

حکومت نے بل گیٹس کو ان کی خدمات کے اعتراف میں ہلال پاکستان ایوارڈ سے نواز دیا، بل گیٹس نے پاکستان میں انسداد پولیو مہم پر پاکستانی کاوشوں کا اعتراف کرتے ہوئے آئندہ بھی ساتھ دینے کی یقین دہانی کرادی۔

ایکسپریس نیوز کے مطابق مائیکرو سوفٹ کے بانی بِل گیٹس پہلی بار ایک روزہ دورے پر پاکستان پہنچ گئے، اسلام آباد میں انہوں نے انسدادپولیو پروگرام کا دورہ کیا۔

انہیں انسداد پولیو پروگرام کے سربراہ ڈاکٹر شہزاد بیگ نے بریفنگ دی اور کورونا سمیت پولیوکی روک تھام سے متعلق اقدامات سے آگاہ کیا۔ اس موقع پر معاون خصوصی براے صحت ڈاکٹر فیصل سلطان بھی موجود رہے۔

پولیو ورکرز اور والدین کے تعاون سے پاکستان پولیو فری ہوا، بل گیٹس

ذرائع کے مطابق بل گیٹس نے پولیو سے متعلق اقدامات کو سراہا اور کہا کہ پاکستان نے پولیو کے خاتمے کے لیے اقدامات کیے ہیں۔ ذرائع کے مطابق بل گیٹس نے پاکستان کے پولیو ورکرز، ہیلتھ ورکرز اور والدین کے تعاون کو بھی سراہا اور کہا کہ پولیو ورکرز اور والدین کے تعاون کے باعث پاکستان ایک سال سے پولیو فری ہے، پاکستان کے ساتھ پولیو پروگرام میں تعاون جاری رکھا جائے گا۔

وزیراعظم عمران خان سے ملاقات

بعد ازاں وزیراعظم عمران خان اور بل گیٹس کے درمیان ملاقات ہوئی جس میں پولیو کے خاتمہ اور دوسرے اہم موضوعات پر بات چیت ہوئی۔

وزیراعظم عمران خان @ImranKhanPTI کی @BillGates بل گیٹس کے ساتھ وزیراعظم ہاؤس میں ملاقات۔ جس میں پولیو کے خاتمہ اور دوسرے اہم موضوعات پر بات چیت ہوئی۔ pic.twitter.com/JjdUErh9ZC

— PTI (@PTIofficial) February 17, 2022

وزیراعظم کی جانب سے بل گیٹس کے اعزاز میں ظہرانہ بھی دیا گیا جس میں وفاقی وزرا اور دیگر حکام نے بھی شرکت کی۔

Prime Minister @ImranKhanPTI's luncheon in honor of @BillGates

Mr. Bill Gates is visiting Pakistan at the special invitation of the Prime Minister. pic.twitter.com/0D00LDxsCu

— PTI (@PTIofficial) February 17, 2022

قبل ازیں معاون خصوصی صحت ڈاکٹر فیصل سلطان کا کہنا تھا کہ مائیکرو سوفٹ کے بانی پہلی بار پاکستان آئے، ہم ان کے دورے کا خیرمقدم کرتے ہیں۔

این سی او سی کا دورہ

مائیکرو سوفٹ کے بانی بل گیٹس نے این سی او سی کا دورہ بھی کیا اور ارکان سے ملاقاتیں کیں، انہیں کورونا وائرس، اس کے خلاف حکومتی اقدامات اور عوام کی ویکسی نیشن سے متعلق بھی بریفنگ دی گئی۔

#BillGates, Co-Chair of the Bill and Melinda Gates Foundation (#BMGF), on Thursday appreciated Pakistan’s success against Covid-19 despite resource constraints and introducing excellent initiatives and measures for public health safety. pic.twitter.com/5K9GMvTvPQ

— Pakistan Observer (@pakobserver) February 17, 2022

بل گیٹس کو ہلال پاکستان ایوارڈ سے نواز دیا گیا

حکومت پاکستان کی جانب سے بل گیٹس کو ان کی خدمات پر ہلال پاکستان ایوارڈ سے نوازا گیا۔ اس حوالے سے ایوان صدر میں ان کے اعزاز میں تقریب منعقد ہوئی جس میں صدر مملکت ڈاکٹر عارف علوی نے انہیں اس ایوارڈ سے نوازا۔

سرکاری اعلامیہ

سرکاری اعلامیے کے مطابق وزیراعظم عمران خان کی خصوصی دعوت پر بل گیٹس نے پاکستان کا دورہ کیا اور قومی ٹاسک فورس برائے انسداد پولیو کے اجلاس میں شرکت کی۔

پاکستان کے انسداد کورونا اقدامات حیران کن ہیں، بل گیٹس

اس موقع پر مائیکرو سافٹ کمپنی کے بانی بل گیٹس نے کہا کہ پولیو کے خاتمے کے لیے پاکستان کے اقدامات اور عزم متاثر کن ہیں، ہم پولیو کے خلاف جنگ کے آخری مراحل کے قریب ہیں، پاکستان کے پاس پولیو کا خاتمہ کرکے تاریخ رقم کرنے کا موقع ہے، پاکستان کے انسداد کورونا اقدامات حیران کن ہیں۔

پاکستان کیلیے بل اینڈ میلنڈا گیٹس فاؤنڈیشن کی حمایت کو سراہتے ہیں، عمران خان

وزیراعظم عمران خان نے کہا کہ پاکستان کے لیے بل اینڈ میلنڈا گیٹس فاؤنڈیشن کی حمایت کو سراہتے ہیں، حکومت ملک سے پولیو کے خاتمے کے لیے پوری طرح پرعزم ہے، عالمی دنیا انسانی بحران کے شکار 40 ملین افغانوں کی مدد کرنی چاہیے، کے پی کے جنوبی اضلاع پولیو کے خلاف جنگ میں متحرک رہیں۔