بھارت اور یو اے ای کے مابین معیشت کو فروغ دینے کیلئے بڑے تجارتی معاہدوں پر دستخط

بھارتی وزیر خارجہ ایس جے شنکر کے حوالے سے بتایا گیا کہ معاہدے پر دستخط ’ہمارے دو طرفہ تعلقات میں ایک سنگ میل کی حیثیت رکھتا ہے‘۔—فائل فوٹو

---

بھارت اور متحدہ عرب امارات (یو اے ای) کے مابین تجارتی اور سرمایہ کاری پر مبنی 'سنگ میل' کے حامل معاہدوں پر دستخط ہوگئے جس کے دونوں ممالک کے تجارتی سامان پر 80 فیصد محصولات کی چھوٹ ہوگی۔

غیرملکی خبررساں اداروں کے مطابق معاہدے کے بعد دونوں ممالک کے درمیان سالانہ تجارت 5 برس کے اندر 100 ارب ڈالر تک پہنچ جائے گی۔

بھارتی وزیر اعظم نریندر مودی اور متحدہ عرب امارات کے حکمران شیخ محمد بن زید النہیان کی ورچوئل موجودگی میں دونوں ممالک کے سینئر عہدیداروں نے معاہدے پر دستخط کیے۔

خیال رہے کہ بھارت پہلے ہی یو اے ای کا ایک بڑا تجارتی شراکت دار ہے۔ سرکاری اماراتی خبر رساں ایجنسی نے بھارتی وزیر خارجہ ایس جے شنکر کے حوالے سے بتایا کہ معاہدے پر دستخط 'دو طرفہ تعلقات میں ایک سنگ میل کی حیثیت رکھتا ہے'۔

بھارتی وزیر اعظم کے دفتر کی جانب سے کہا گیا کہ جامع اقتصادی شراکت داری کا معاہدہ (سی ای پی اے) سے توقع ہے کہ سالانہ دو طرفہ غیر تیل پر مبنی تجارت آئندہ 3 سے 5 برس میں 60 ارب سے 100 ارب ڈالر تک بڑھ جائے گی۔

Great pleasure to hold Virtual Summit with my friend HH @MohamedBinZayed Crown Prince of Abu Dhabi. India-UAE comprehensive strategic partnership has undergone huge transformation in the past 7 years. We issued a Joint Vision Statement that lays the future roadmap for our ties.

— Narendra Modi (@narendramodi) February 18, 2022

اماراتی وزیر مملکت برائے خارجہ تجارت نے غیرملکی خبررساں ادارے 'رائٹرز' کو بتایا کہ دونوں ممالک کے درمیان تجارت اور سرمایہ کاری کا بہت بڑا معاہدہ ہوا اور اس سے مزید کاروباری مواقع کے دروازے کھلیں گے۔

انہوں نے کہا کہ معاہدہ کے تحت متحدہ عرب امارات اور بھارت کے سامان پر 80 فیصد محصولات ختم کردی گئی ہیں جبکہ تمام محصولات کو آئندہ 10 برس کے اندر ختم کیا جائے گا۔