سندھ میں میٹرک کے امتحانات 17 مئی اور انٹر کے یکم جون سے لینے کی تجویز

صوبے میں نئے تعلیمی سیشن 2022 کا آغاز یکم اگست سے کرنے کی تجویز دی گئی ہے (فوٹو، فائل)

---

PESHAWAR: صوبہ سندھ میں میٹرک کے امتحانات 17 مئی اور انٹرمیڈیٹ کے یکم جون سے لینے کی تجویز سامنے آئی جس کی منظوری کے لیے اسٹیئرنگ کمیٹی کا اجلاس منگل کو طلب کرلیا گیا۔

ایکسپریس نیوز کے مطابق محکمہ تعلیم سندھ نے صوبے میں نئے تعلیمی سیشن 2022 اور میٹرک و انٹر کے امتحانات کی تاریخوں کے تعین کے لیے اسٹیئرنگ کمیٹی کا اجلاس منگل 22 فروری کو طلب کرلیا، اس حوالے سے تعلیمی افسران اور چیئرمین بورڈز سمیت دیگر کو اجلاس کا ایجنڈا بھی بھجوا دیا گیا ہے۔

اجلاس کے ایجنڈے کے مطابق سندھ میں میٹرک کے امتحانات منگل 17 مئی اور انٹر کے امتحانات بدھ یکم جون سے شروع کرنے کی سفارش کی گئی ہے مزید براں پورے صوبے میں نئے تعلیمی سیشن 2022 کا آغاز یکم اگست سے کرنے کی تجوہز دی گئی ہے۔

واضح رہے کہ صوبائی وزیر تعلیم سردار شاہ کی زیر صدارت ہونے والے اسٹیئرنگ کمیٹی کے اجلاس میں 2022 کے تعلیمی کیلینڈر کی منظوری بھی دی جائے گی جس کے تحت موسم گرما کی تعطیلات جون و جولائی جبکہ موسم سرما کی تعطیلات 22 دسمبر سے 31 دسمبر 2022 تک ہوں گی۔

اسی طرح اجلاس میں نویں اور گیارہویں جماعتوں کے داخلے اور میٹرک و انٹر کے نتائج کے اجرا کی تاریخوں کا بھی تعین کیا جائے گا جبکہ سال 2022 کی تعلیمی اداروں میں دی جانے والی تعطیلات کی بھی منظوری دی جائے گی، ایجنڈے کے مطابق تعلیمی اداروں کی سالانہ تعطیلات میں کوئی کمی بیشی نہیں کی گئی ہے۔

دوسری جانب پرائمری سے آٹھویں جماعت تک کے امتحانات بھی مئی کے پہلے ہفتے میں شیڈول کیے گئے ہیں جبکہ اسٹیئرنگ کمیٹی کا اجلاس تاخیر سے بلانے کے سبب میٹرک سسٹم کے حامل بیشتر نجی اسکول یہ امتحانات اپریل میں شیڈول کرچکے ہیں۔