حجاب پر پابندی کیخلاف سماعت کرنیوالے جج پر تنقید کرنا اداکار کو مہنگا پڑ گیا

بھارتی پولیس نے حجاب پابندی کے خلاف دائر درخواست کی سماعت کرنے والے جج پر تنقید کرنے والے اداکار کو گرفتار کرلیا۔

بھارتی میڈیا رپورٹ کے مطابق مقامی فلموں کے اداکار چیتن کمار کو بنگلورو پولیس نے لوگوں کو اشتعال دلانے اور تشدد پر اکسانے کے الزام میں گرفتار کیا ہے۔

چیتن کمار نےگزشتہ دنوں ٹویٹر پر ایک پوسٹ شیئر کی تھی جس میں حجاب پابندی کیس کی سماعت کرنے والے بینچ میں جسٹس کرشنا ڈکشٹ کی شمولیت پر سوال اٹھایا تھا۔

چیتن کمارن نے اپنی پرانی ٹوئٹ کو ری ٹوئٹ کرتے ہوئے لکھا تھا کہ '2 سال قبل کرناٹک ہائی کورٹ کے فیصلے کے حوالے سے یہ ٹوئٹ کی تھی، اس فیصلے میں جسٹس کرشنا نے ریپ کیس کے حوالے سے انتہائی متنازع بیان دیا تھا اور اب وہی جج اسکولوں میں حجاب پر پابندی کا فیصلہ کرنے جارہے ہیں'۔

اداکار نے ٹوئٹ میں سوال اٹھایا تھا کہ کیا جسٹس کرشنا کو اس حوالے سے وضاحت نہیں دینی چاہیے؟۔

This is a tweet I wrote nearly two years ago regarding a Karnataka High Court decision

Justice Krishna Dixit made such disturbing comments in a rape case

خیال رہے کہ بھارتی ریاست کرناٹک میں اسکولوں اور بعض کالجوں میں مسلمان طالبات کے حجاب اور برقع پہننے پر پابندی عائد کی گئی ہے، جس کے خلاف درخواست پر سماعت کرناٹک ہائیکورٹ 10 روز سے مسلسل سماعت جاری ہے۔

بھارت میں حجاب پر پابندی کا معاملہ سنجیدہ نوعیت اختیار کرتا جا رہا ہے جس کے خلاف ہندوانتہاپسند باقاعدہ مہم چلارہے ہیں جبکہ گزشتہ روز حجاب کے حق میں درخواست دائر کرنے والی طالبہ شفاء کے بھائی اور والد کو بھی تشدد کا نشانہ بنایا گیا تھا۔